Të zgjohesh herë pas here gjatë natës është normale. Por, nëse sytë ju hapen vazhdimisht rreth orës 3 ose 4 të mëngjesit dhe më pas e keni të vështirë të flini përsëri, mund të ketë disa faktorë që po ndikojnë në gjumin tuaj.

Stresi dhe ankthi janë ndër arsyet më të zakonshme. Kur truri mbetet në gjendje tensioni, gjumi mund të bëhet më i lehtë dhe zgjimet gjatë natës më të shpeshta.

Edhe ndryshimet natyrale në ciklet e gjumit luajnë rol. Në orët e hershme të mëngjesit kalojmë në faza më të lehta të gjumit, prandaj zhurmat, temperatura apo shqetësimet e vogla mund të na zgjojnë më lehtë.

Alkooli, kafeina dhe ushqimi vonë në mbrëmje gjithashtu mund të ndikojnë në cilësinë e gjumit. Alkooli mund t’ju ndihmojë të flini më shpejt, por shpesh e ndërpret gjumin në pjesën e dytë të natës.

Zgjimet e shpeshta mund të lidhen edhe me ndryshimet hormonale, menopauzën, nevojën për të urinuar apo çrregullime të gjumit, përfshirë apnenë e gjumit.

Nëse kjo ndodh vazhdimisht, ju lë të lodhur gjatë ditës ose shoqërohet me simptoma të tjera, konsultimi me mjekun mund të ndihmojë në identifikimin e shkakut.

Ora 3 apo 4 e mëngjesit nuk ka ndonjë “kuptim misterioz” për trupin – por zgjimi i vazhdueshëm mund të tregojë se cilësia e gjumit po ndikohet nga diçka.