Hematologet Dr. Fitim Gashi dhe Dr. Adriatik Berisha, ishin të ftuar të dielën në emisionin “Familja Jonë”, ku folën për limfomën, simptomat, diagnostikimin dhe faktorët që lidhen me këtë sëmundje.
Me rastin e Ditës Ndërkombëtare të Limfomës, e cila shënohet më 15 shtator, mjekët shpjeguan se limfoma është një sëmundje e sistemit limfatik dhe mund të shfaqet në forma të ndryshme. Ajo nuk prek të gjithë pacientët në të njëjtën mënyrë dhe simptomat mund të ndryshojnë nga një person te tjetri.
Një nga shenjat më të njohura janë nyjet limfatike të zmadhuara. Megjithatë, jo çdo nyje e zmadhuar nënkupton limfomë. Infeksionet dhe gjendje të tjera mund të shkaktojnë zmadhimin e tyre, ndërsa vëmendje më e madhe duhet t’i kushtohet nyjeve që qëndrojnë të zmadhuara për një kohë të gjatë ose shoqërohen me simptoma të tjera.
Gashi dhe Berisha folën edhe për shenjat që mund të shfaqen kur sëmundja nuk është e dukshme përmes nyjeve limfatike. Lodhja e vazhdueshme, djersitjet e natës dhe humbja e pashpjegueshme e peshës mund të jenë ndër shenjat që kërkojnë vlerësim mjekësor, megjithëse këto simptoma mund të lidhen edhe me shumë gjendje të tjera.
Në emision u diskutua edhe rruga e diagnostikimit. Analizat e zakonshme të gjakut nuk e zbulojnë gjithmonë limfomën, ndaj kur ekziston dyshimi për sëmundjen mund të nevojiten ekzaminime të tjera, përfshirë imazherinë dhe, në varësi të rastit, analiza të indeve.
Mjekët shpjeguan gjithashtu se limfomat nuk janë të gjitha të njëjta. Ekzistojnë lloje të ndryshme të sëmundjes, të cilat mund të shfaqen në mosha të ndryshme dhe të kenë karakteristika e trajtime të ndryshme.
Gjatë bisedës u trajtua edhe origjina e limfomës dhe roli i faktorëve gjenetikë. Sipas mjekëve, gjenetika nuk është faktori kryesor në shumicën e rasteve, ndërsa disa viruse mund të lidhen me zhvillimin e disa llojeve të limfomës.
Një pjesë e diskutimit iu kushtua edhe fëmijëve, pasi limfoma mund të shfaqet edhe në moshë të re, si dhe rasteve kur sëmundja mund të prekë organe jashtë nyjeve limfatike.
Mjekët theksuan rëndësinë e vlerësimit të simptomave dhe konsultimit me mjekun kur ato janë të vazhdueshme ose të pashpjegueshme. Diagnostikimi i hershëm mund të jetë i rëndësishëm për përcaktimin e trajtimit dhe menaxhimin e sëmundjes.
Në kuadër të Ditës Ndërkombëtare të Limfomës, mjekët e Hematologjisë në Kosovë organizuan më 15 shtator aktivitete informuese dhe analiza për qytetarët në sheshin “Zahir Pajaziti” në Prishtinë.
