Jeta është plot me ngritje dhe ulje. Adoleshentët që kanë qëndrueshmëri kanë besimin për t’u përballur me sfida, për të mësuar nga vështirësitë dhe për të vazhduar përpara edhe kur gjërat vështirësohen.
Për këtë UNICEF rekomandon tre mënyra që ju ndihmojnë adoleshentin tuaj të ndërtojë qëndrueshmëri:
1. Inkurajoni zgjidhjen e problemeve
Kur gjërat shkojnë keq, shmangni tundimin për t’u hedhur menjëherë dhe për t’ia zgjidhur problemin adoleshentit tuaj. Në vend të kësaj, mbështeteni duke e inkurajuar të mendojë për zgjidhje.
Kur hasin një pengesë, qoftë një detyrë e vështirë në matematikë, një problem miqësie apo një keqkuptim me një të rritur, udhëzojini duke bërë pyetje si çfarë mendoni se mund të provoni? Ose çfarë keni bërë më parë?
Kështu ju i tregoni se besoni në aftësinë e tyre për të përballuar sfidat e jetës dhe i kujtoni se mund të përdorin krijimtarinë e tyre për të gjetur zgjidhje.
2. Mësojini si të përballen me zhgënjimin
Jeta ka pjesën e vet të momenteve zhgënjyese dhe të mësuarit si të përballohet zhgënjimi është një pjesë thelbësore e zhvillimit të qëndrueshmërisë.
Kur diçka nuk shkon siç shpresonte adoleshenti juaj, ndoshta u largua nga një ekip sportiv ose nuk mori punën që donte, inkurajojeni ta pranojë zhgënjimin në vend se ta shmangë.
Mësojini të shprehin ndjenjat e tyre. Të reflektojnë mbi atë që mund të nxjerrin nga përvoja dhe pastaj të përqendrohen te hapat e radhës. Aftësia për të pranuar zhgënjimin ndërsa vazhdojnë përpara është një pjesë kyçe e qëndrueshmërisë.
3. Mbroni shtyllat që ndërtojnë qëndrueshmërinë
Qëndrueshmëria nuk krijohet vetvetiu. Ajo ndërtohet mbi zakone të mira që i ndihmojnë adoleshentët të ndihen të fortë, të qëndrueshëm dhe të gatshëm për t’u përballur me sfidat e jetës.
Gjumi i mjaftueshëm, ushqimi i shëndetshëm, aktiviteti fizik dhe kultivimi i marrëdhënieve të ngushta i ndihmojnë adoleshentët të rikuperohen pas vështirësive.
Dhe mos harroni, edhe të rriturit kanë nevojë të mbrojnë shtyllat e tyre të qëndrueshmërisë. Kujdesi për veten modelon zakone të shëndetshme për adoleshentët tanë dhe na ndihmon të jemi prania e qetë dhe e qëndrueshme që ata kanë nevojë kur kalojnë momente të vështira.
Për ju, për adoleshentin tuaj dhe për ndërtimin e qëndrueshmërisë së bashku. /UNICEF/
