Sot u mbajt mbledhja e Kolegjiumit Profesional me Drejtorin e QKMF-së, menaxhmentin e lartë dhe shefat e njësive, e cila kishte në fokus zbatimin e dispozitave të Ligjit për Shëndetësi Nr. 04/L-125.

Gjatë takimit u diskutua për përshkrimin e barnave me emërtim ndërkombëtar të pambrojtur (INN/emër gjenerik), si dhe për parimet që garantojnë integritetin profesional dhe etik në sistemin publik shëndetësor. U theksua rëndësia e respektimit të kuadrit ligjor në procesin e vendimmarrjes klinike, me qëllim që praktika mjekësore të jetë e standardizuar, e drejtë dhe transparente, gjithmonë në interes të pacientit.

Qëllimi i Ligjit për Shëndetësi është ruajtja dhe përparimi i shëndetit të qytetarëve përmes ofrimit të shërbimeve gjithëpërfshirëse dhe cilësore, duke respektuar dinjitetin dhe të drejtat themelore të njeriut. Në këtë kontekst, pjesëmarrësit riafirmuan përkushtimin për zbatim të plotë të ligjit dhe të standardeve profesionale.

Vëmendje e veçantë iu kushtua rolit të QKMF-së dhe QMF-ve në përshkrimin racional të barnave nga Lista Esenciale. Ky proces jo vetëm që lehtëson ndjeshëm barrën financiare të pacientëve, pasi këto barna ofrohen falas, por njëkohësisht siguron terapi të sigurta, efektive dhe të bazuara në standarde profesionale.