Laboratori Referent i Influencës ka përmbyllur me sukses pjesëmarrjen në programin ndërkombëtar të vlerësimit të jashtëm të cilësisë (External Quality Assessment – EQA) për vitin 2025, të organizuar në kuadër të Programit Global të Influencës nga Organizata Botërore e Shëndetësisë.

Ky vlerësim përbën një mekanizëm kyç për garantimin e saktësisë dhe besueshmërisë së diagnostikës molekulare, si dhe për sigurimin e standardeve të larta profesionale në monitorimin e viruseve respiratore. Pjesëmarrja aktive në këtë program dëshmon përkushtimin e vazhdueshëm të laboratorit në forcimin e kapaciteteve shkencore dhe në mbrojtjen e shëndetit publik.

Çfarë përfshinte vlerësimi?
Në kuadër të Sistemit Global të Mbikëqyrjes dhe Reagimit ndaj Influencës (GISRS), paneli i vitit 2025 përfshiu:
•Detektimin e virusit të influencës me RT-PCR
•Detektimin e COVID-19 me RT-PCR
•Detektimin e virusit respirator sincicial (RSV) me RT-PCR
•Analizën gjenomike për klada (variante gjenetike) të gjenit HA (hemagglutinin) të virusit të influencës.

Rezultatet dhe performanca
Laboratori Referent i Influencës arriti rezultat maksimal në të gjitha komponentët e testimit:
– Identifikim i saktë i të gjitha mostrave
– Raportim brenda afateve të përcaktuara
– Vlerësim i plotë dhe certifikim nga programi i Organizata Botërore e Shëndetësisë.

Ky sukses konfirmon nivelin e lartë të profesionalizmit dhe besueshmërisë së laboratorit në diagnostikën virologjike, duke fuqizuar rolin e tij në rrjetin global të mbikëqyrjes së influencës.

Pse ka rëndësi kjo?
Rezultatet e arritura kontribuojnë drejtpërdrejt në:
•Sigurimin e cilësisë së shërbimeve laboratorike në vend
•Përmirësimin e gatishmërisë ndaj shpërthimeve epidemike
•Fuqizimin e bashkëpunimit ndërkombëtar në mbrojtjen e shëndetit publik.

Instituti Kombëtar mbetet i përkushtuar për avancimin e kapaciteteve diagnostikuese dhe për garantimin e sigurisë shëndetësore për të gjithë qytetarët.