Një artist futi fshehurazi një print të krijuar nga inteligjenca artificiale (AI) në një mur të galerisë, para se vizitorët e hutuar t’i tërhiqnin vëmendjen stafit të muzeut.

Printi u vendos në National Museum Cardiff nga artisti misterioz Elias Marrow, i cili tha se vepra e tij “Empty Plate” që tregon një djalë të ri në uniformë shkolle duke mbajtur një pjatë u pa nga “disa qindra persona” para se të hiqej.

Një vizitor që e vuri re veprën pyeti një anëtar të stafit për të, por tha se punonjësi i muzeut “pranoi se nuk kishte asnjë ide për veprën apo për momentin kur ishte vendosur”.

Një zëdhënës i Amgueddfa Cymru tha: “Një objekt u vendos pa leje në një mur të galerisë në National Museum Cardiff. Na u bë e ditur dhe e kemi hequr objektin në fjalë.”

Vepra, e krijuar fillimisht me ndihmën e inteligjencës artificiale dhe pastaj e printuar, u vendos nga Marrow në seksionin bashkëkohor të muzeut, ndërsa faqja e tij e internetit thotë se Empty Plate “përfaqëson Uellsin në vitin 2025”.

Marrow ishte i interesuar në “si vendosin institucionet publike se çfarë ia vlen të ekspozohet dhe çfarë ndodh kur diçka jashtë këtij sistemi shfaqet brenda tij”.

Ai tha se përdorimi i inteligjencës artificiale për të krijuar veprën ishte “pjesë e evolucionit natyral të mjeteve artistike”, duke shtuar se e kishte skicuar imazhin para se të përdorte AI-në.

“AI ka ardhur për të qëndruar; të kontrollosh aftësitë e saj do të ishte në kundërshtim me bindjet që mbaj të shenjta për artin,” shtoi ai.

Marrow tha se vizitorët kishin reaguar mirë ndaj veprës dhe kishin bërë foto.
Artistii, i cili tha se shaka të ngjashme që kishte bërë në Bristol Museum dhe Tate Modern nuk ishin “të aprovuara, të miratuara ose të njohura”, mohoi se bëhej fjalë për vandalizëm.

“Vepra nuk ka të bëjë me prishje. Ka të bëjë me pjesëmarrje pa leje,” tha ai.

“Nuk po kërkoj leje, por gjithashtu nuk po shkaktoj dëme.”

Një vizitor i muzeut nga Irlanda, që e pa veprën më 29 tetor, tha se kishte menduar se mund të ishte “art performues”, por më pas “shpejt kuptoi se bëhej fjalë për një veprim gueril”.

Ai shtoi se ishte pyetur se “pse një vepër AI me cilësi të dobët ishte vendosur aty pa u etiketuar si e tillë” dhe iu afrua stafit vetëm për të mësuar se askush nuk e dinte se çfarë ishte.