Shumë njerëz përballen me kosto të larta të barnave me recetë dhe, për të kursyer para, zgjedhin t’i ndajnë tabletat në gjysmë. Megjithatë, ndarja e ilaçeve nuk është gjithmonë e sigurt. Në disa raste mund të jetë një mënyrë e pranueshme për të ulur shpenzimet ose për ta bërë më të lehtë gëlltitjen e tabletës, por vetëm nëse kjo bëhet me miratimin e mjekut ose farmacistit.
Sipas Dr. Craig Svensson, profesor i kimisë mjekësore dhe farmakologjisë molekulare në Purdue University College of Pharmacy, një nga arsyet më të zakonshme për ndarjen e tabletave është kursimi financiar. Nëse një pacient ka nevojë për një dozë prej 50 miligramësh, ndërsa tableta prodhohet vetëm në dozën 100 miligramë, blerja e tabletave më të forta dhe ndarja e tyre mund të jetë më ekonomike. Në raste të tjera, mjeku mund të përshkruajë një dozë më të vogël se ajo që ofrohet në treg ose pacienti mund të ketë vështirësi në gëlltitjen e një tablete të madhe, duke e bërë ndarjen e saj më praktike.
Megjithatë, ekspertët theksojnë se jo të gjitha ilaçet mund të ndahen në mënyrë të sigurt. Tabletat me shtresë mbrojtëse (enteric-coated) nuk duhet të priten, sepse kjo shtresë është projektuar që të mos tretet në stomak, por vetëm pasi tableta të arrijë në zorrë. Sipas Dr. Svensson, nëse kjo shtresë dëmtohet, ilaçi humbet mbrojtjen që ishte menduar të ofronte për stomakun.
Po ashtu, nuk duhet të ndahen apo të shtypen barnat me çlirim të zgjatur ose të kontrolluar, të cilat shpesh shënohen me shkurtesa si XR, ER ose SR. Dr. Maria Torroella Carney, drejtuese e Divizionit të Mjekësisë Geriatrike dhe Kujdesit Paliativ në Northwell Health, shpjegon se ndarja e këtyre tabletave mund të bëjë që ilaçi të çlirohet shumë shpejt dhe në sasi më të madhe, duke rritur rrezikun e efekteve anësore ose mbidozimit.
Një tregues se një tabletë mund të ndahet është vija e gdhendur në mes ose në katër pjesë. Megjithatë, edhe kjo nuk është garanci. Dr. Svensson rekomandon që pacientët të konsultohen gjithmonë me farmacistin, pasi formulimi i të njëjtit ilaç mund të ndryshojë nga një prodhues te tjetri dhe kjo ndikon nëse tableta mund të ndahet apo jo.
Përpara se të ndani një ilaç, është e rëndësishme të flisni me mjekun ose farmacistin. Ndryshimi i mënyrës së marrjes së një medikamenti pa dijeninë e profesionistëve shëndetësorë mund të ndikojë në vlerësimin e trajtimit. Dr. Carney thekson se mjekët dhe infermierët marrin vendime bazuar në dozën që besojnë se pacienti po përdor, ndaj është thelbësore të jeni të sinqertë për çdo ndryshim që bëni.
Edhe kur një tabletë mund të ndahet, kjo duhet bërë me kujdes. Një studim i publikuar në PubMed ka treguar se tabletat e ndara mund të kenë ndryshime të konsiderueshme në peshë dhe në sasinë e ilaçit që përmban secila pjesë, gjë që mund të ndikojë në dozimin. Për këtë arsye, nëse tableta ka vijë ndarëse, ajo duhet të thyhet përgjatë asaj vije. Nëse copëtohet ose nuk ndahet në mënyrë të rregullt, është më mirë të mos përdoret.
Një alternativë më e sigurt është përdorimi i një prerësi të posaçëm për tableta, i cili mund të blihet në farmaci ose në dyqane online. Ekspertët këshillojnë gjithashtu që tabletat të mos ndahen të gjitha njëherësh, pasi disa ilaçe mund të humbasin qëndrueshmërinë dhe efektivitetin pasi janë prerë. Për këtë arsye, është më mirë që ndarja të bëhet vetëm në momentin kur ilaçi do të merret sipas artikullit SingleCare.
