Një studim i ri i realizuar nga studiues të Harvardit sugjeron se ushtrimet me pesha mund të jenë një nga mënyrat më efektive për të mbrojtur trurin dhe për të zgjatur jetën.

Sipas hulumtimit, personat që kryejnë mes 90 dhe 119 minuta ushtrime forcimi në javë kanë 13% më pak rrezik për vdekje të parakohshme, 19% më pak rrezik nga sëmundjet kardiovaskulare dhe 27% më pak rrezik nga sëmundjet neurologjike që lidhen me demencën, sipas New York Post, raporton FamiljaJonë.

Studimi analizoi të dhënat e më shumë se 147 mijë të rriturve për një periudhë mbi 30-vjeçare. Rezultatet treguan se përfitimet më të mëdha u vunë re tek ata që kombinonin ushtrimet me pesha me aktivitet aerobik si ecja e shpejtë, vrapimi ose çiklizmi. Në këto raste, rreziku i vdekjes së hershme u ul deri në 45%.

Ekspertët theksojnë se nuk është e nevojshme të kalohen orë të tëra në palestër. Sipas tyre, dy deri në tre seanca të shkurtra në javë mund të jenë të mjaftueshme për të përmirësuar shëndetin e zemrës, për të ruajtur masën muskulore dhe për të mbrojtur funksionet e trurit me kalimin e moshës.

Megjithatë, studiuesit paralajmërojnë se mbi 120 minuta ushtrime me pesha në javë nuk sollën përfitime shtesë të dukshme, duke sugjeruar se çelësi është konsistenca dhe jo teprimi./FamiljaJonë

Burimi: Studim i bazuar në kërkime të Harvard T.H. Chan School of Public Health.