Gjysma e popullsisë botërore pritet të jetojë me mbipeshë ose obezitet deri në vitin 2035. Ky paralajmërim vjen nga fushata ndërkombëtare “World Obesity Day”, e udhëhequr nga World Obesity Federation.
Sipas kësaj fushate, rreth 4 miliardë njerëz pritet të preken nga mbipesha ose obeziteti brenda dekadës së ardhshme, duke e kthyer këtë fenomen në një nga sfidat më të mëdha globale të shëndetit publik.
Në kuadër të kësaj nisme, më 4 mars shënohet Dita Botërore e Obezitetit 2026, e cila synon të bashkojë njerëz, organizata dhe aleanca nga e gjithë bota për të rritur ndërgjegjësimin dhe për të nxitur veprime konkrete në parandalimin dhe trajtimin e obezitetit.
E organizuar nga World Obesity Federation në bashkëpunim me anëtarët e saj globalë, kjo ditë vë theksin te nevoja urgjente për më shumë mirëkuptim dhe qasje më efektive ndaj kësaj çështjeje.
Në materialin informues theksohet se obeziteti nuk është vetëm problem i të rriturve, por po prek gjithnjë e më shumë edhe fëmijët.
“Obeziteti në fëmijëri po rritet me ritme të shpejta dhe përqindja e fëmijëve të moshës shkollore me obezitet është rritur pothuajse pesë herë që nga viti 1975, veçanërisht në vendet me të ardhura të ulëta dhe të mesme.”
Sipas fushatës, obeziteti në fëmijëri shpesh vazhdon edhe në moshë madhore, duke rritur rrezikun për sëmundje serioze jo të transmetueshme, si diabeti, sëmundjet e zemrës dhe disa lloje të kancerit.
Po ashtu, theksohet se obeziteti nuk ndodh i izoluar, por ndikohet nga faktorë të shumtë socialë dhe ekonomikë.
“Varfëria, stigma, qasja e pabarabartë në arsim dhe kujdes shëndetësor, mungesa e ushqimit të shëndetshëm dhe mjediset që nuk e mbështesin jetesën e shëndetshme ndikojnë në rrezikun dhe pasojat gjatë gjithë jetës.” ka bërë të ditur fushata ndërkombëtare “World Obesity Day”.
Aktualisht, rreth 3 miliardë njerëz në mbarë botën, përfshirë mbi 400 milionë fëmijë të moshës shkollore, jetojnë me mbipeshë ose obezitet, ndërsa kjo shifër pritet të arrijë në 4 miliardë deri në vitin 2035.
Megjithatë, organizatorët theksojnë se kjo situatë mund të ndryshohet nëse ndërmerren hapa të hershëm dhe të koordinuar.
“Duke e kuptuar obezitetin në vend që ta stigmatizojmë, duke i dhënë përparësi parandalimit që në vitet e hershme të jetës, duke vendosur në qendër përvojën e jetuar të individëve dhe duke siguruar qasje të barabartë në kujdes, ne mund të ndryshojmë drejtimin e kësaj situate.” thekson ky material.
“Dita Botërore e Obezitetit 2026 është një thirrje për veprim për të gjithë ne, 8 miliardë njerëzit e kësaj bote. Së bashku, ne mund ta ndryshojmë rrëfimin për obezitetin.” theksohet tutje.
