Në përgjithësi, përdorimi i aspirinës gjatë shtatzënisë nuk rekomandohet, përveç rasteve kur ekzistojnë kushte të caktuara mjekësore. Aspirina me dozë të ulët (60–100 mg në ditë) është konsideruar e sigurt dhe ndonjëherë përshkruhet për gratë që kanë pasur humbje të përsëritura të shtatzënisë, çrregullime të koagulimit apo preeklampsi.

Megjithatë, përdorimi i dozave më të larta të aspirinës mund të jetë i rrezikshëm, në varësi të periudhës së shtatzënisë, shkruan Medical Xpress.

Gjatë tremujorit të parë, dozat e larta mund të rrisin rrezikun e humbjes së shtatzënisë dhe të defekteve kongjenitale. Në tremujorin e tretë, aspirina mund të shkaktojë mbylljen e parakohshme të një ene gjaku në zemrën e fetusit, gjë që ndikon në funksionimin normal të qarkullimit të gjakut.

Përdorimi i zgjatur i aspirinës në doza të larta gjatë shtatzënisë mund të shtojë gjithashtu rrezikun e gjakderdhjes në tru tek foshnjat e lindura para kohe.

Administrata Amerikane e Ushqimit dhe Barnave (FDA) rekomandon shmangien e barnave anti-inflamatore josteroidale (NSAIDs), përfshirë aspirinën, pas javës së 19-të të shtatzënisë, përveç rasteve kur mjeku e konsideron të domosdoshme.

Arsyeja është se këto barna mund të shkaktojnë probleme të rralla, por serioze në veshkat e fetusit, duke çuar në ulje të lëngut amniotik dhe në komplikime të tjera të mundshme.

Në çdo rast, përdorimi i aspirinës gjatë shtatzënisë duhet bërë vetëm nën mbikëqyrje mjekësore.