Vitamina E është një vitaminë e tretshme në yndyrë dhe një antioksidant i fuqishëm që mbron qelizat nga dëmtimi i shkaktuar nga radikalet e lira. Trupi nuk e prodhon vetë, ndaj duhet të merret përmes ushqimit ose, në raste të veçanta, me suplemente.
Sipas dietologes Patricia Bannan, vetitë antioksiduese të vitaminës E mbrojnë qelizat nga dëmtimet oksidative dhe mbështesin shëndetin e lëkurës, sistemit imunitar dhe zemrës. Ajo thekson se kjo është veçanërisht e rëndësishme për gratë gjatë shtatzënisë, perimenopauzës dhe menopauzës.
Dietologia Jenny Finke shton se vitamina E luan një rol të rëndësishëm në funksionimin e sistemit imunitar dhe mund të ndihmojë në ngadalësimin e ndryshimeve që lidhen me plakjen e tij.
Lidhur me shëndetin e zemrës, një studim i vitit 2025, i kryer te më shumë se 39 mijë persona për 15 vjet, tregoi se marrja më e lartë e vitaminës E nga ushqimi lidhej me një rrezik më të ulët të sëmundjeve kardiovaskulare dhe vdekshmërisë nga të gjitha shkaqet. Mjeku William Li thekson se vitamina E është veçanërisht e rëndësishme për gratë pas menopauzës, pasi ndihmon në ruajtjen e shëndetit të enëve të gjakut.
Sipas Dr. Li, vitamina E mbështet gjithashtu shëndetin riprodhues, duke ndihmuar funksionimin normal të vezoreve dhe mitrës. Jenny Finke shton se gjatë shtatzënisë ajo ndihmon në mbrojtjen e qelizave nga stresi oksidativ, i cili rritet për shkak të ndryshimeve metabolike.
Studimet kanë treguar gjithashtu se marrja e mjaftueshme e vitaminës E lidhet me një rrezik më të ulët të osteoporozës, ndërsa një provë klinike zbuloi se suplementet me vitaminë E mund të ndihmojnë në ngadalësimin e humbjes së masës kockore te gratë pas menopauzës.
Sa i përket shëndetit të trurit, Finke shpjegon se vitamina E ndihmon në mbrojtjen e qelizave nervore nga stresi oksidativ. Një meta-analizë ka lidhur marrjen e lartë të vitaminës E me një rrezik më të ulët të sëmundjes së Alzheimerit, megjithëse studiuesit theksojnë se nevojiten kërkime të mëtejshme.
Vitamina E kontribuon edhe në shëndetin e lëkurës. Studimet sugjerojnë se nivelet e ulëta të saj lidhen me një rrezik më të lartë për sëmundje inflamatore të lëkurës, si psoriaza, dermatiti atopik dhe aknet.
Burime të mira natyrale të vitaminës E janë farat e lulediellit, bajamet, lajthitë, vajrat bimore, spinaqi dhe mango. Patricia Bannan thekson se shumica e grave mund të plotësojnë nevojat ditore përmes ushqimit, ndërsa Dr. Li rekomandon që suplementet të përdoren vetëm kur këshillohen nga mjeku. Dozat e larta mund të rrisin rrezikun e gjakderdhjes dhe të ndërveprojnë me disa medikamente, veçanërisht holluesit e gjakut.
