Momentet lozonjare janë thelbësore për mirëqenien emocionale të fëmijës suaj.

Loja është mënyra se si fëmijët e vegjël mësojnë dhe kuptojnë botën përreth tyre. Ndërsa ata argëtohen, po zhvillojnë aspekte të rëndësishme të rritjes si aftësitë motorike, njohëse, sociale dhe emocionale. Por ndikimi i lojës nuk kufizohet vetëm te të nxënit në moshë të hershme. Ajo ka një rol kyç edhe në ndërtimin e shëndetit mendor të fëmijës suaj dhe të tuajin gjithashtu. Mësoni pse krijimi i kohës për lojë është diçka argëtuese dhe njëkohësisht e shëndetshme.

Sipas UNICEF-it, fëmijët që luajnë rregullisht me prindërit e tyre kanë më pak gjasa të zhvillojnë ankth, depresion, agresivitet apo probleme me gjumin.

Loja ndihmon në forcimin e lidhjes midis jush dhe fëmijës suaj

Ndaja e momenteve të gëzueshme dhe mësimore ndihmon në afrimin e fëmijëve me kujdestarët e tyre. Si lojtarët e parë të fëmijës suaj, ju keni mundësinë të krijoni hapësira për mësim dhe lidhje emocionale që në shtëpi. Kur luani bashkë, ju e shihni botën nga këndvështrimi i fëmijës suaj.

Duke i ofruar dashuri, ngrohtësi dhe vëmendje, ju po vendosni themelet për zhvillimin e aftësive emocionale dhe sociale që ndihmojnë në shëndetin mendor dhe mirëqenien e ardhshme të fëmijës.

Loja ndihmon në uljen e stresit

Lojërat, kërcimi dhe këndimi janë mënyra të shkëlqyera për të lehtësuar stresin, si për fëmijën tuaj ashtu edhe për ju. Kur shijoni momente të bukura dhe qeshni së bashku, trupi lëshon endorfina që nxisin ndjenjën e mirëqenies.

Edhe periudhat e shkurtra të lojës mund të jenë një kujtesë e fuqishme për ju se sa të rëndësishëm jeni në mbështetjen e fëmijës suaj, dhe një mundësi për të harruar punët apo angazhimet e tjera për një moment.

Kërkimet gjithashtu kanë treguar se koha e dedikuar për lojë e mbron fëmijën nga ndikimet negative të stresit të zgjatur. Situatat stresuese që zgjasin shumë mund të ndikojnë në shëndetin fizik dhe mendor të një fëmije. Loja dhe marrëdhëniet pozitive me të rriturit ofrojnë mbështetje dhe ndihmojnë për të zbutur këto pasoja.

Loja ndihmon fëmijët të përpunojnë ndjenjat e vështira

Kur fëmijët përballen me ndjenja të ndërlikuara, kjo shpesh reflektohet në lojërat e tyre. Duke i lënë fëmijët të luajnë lirshëm, ju u jepni mundësinë të përpunojnë ndjenja si dhimbja, frika apo humbja, ndërsa vazhdojnë të sillen si fëmijë. Loja i ndihmon të shprehin gjëra që i shqetësojnë dhe për të cilat ende nuk kanë fjalët për t’i shpjeguar plotësisht.

Duke rikrijuar ngjarje të dhimbshme përmes lojës imagjinative, fëmijët përpiqen të kuptojnë ndikimin e asaj që ka ndodhur. Për shembull, nëse fëmija juaj ka qenë dëshmitar i një konflikti mes të rriturve, mund ta rikrijojë këtë situatë me lodrat e veta.

Loja ndihmon në ndërtimin e vetëbesimit

Zgjidhja e problemeve dhe gjetja e zgjidhjeve kreative gjatë një loje ose gjatë zgjidhjes së një puzzle-i i jep fëmijës ndjesinë e arritjes dhe kompetencës. Kur ju i kushtoni kohë lojës me fëmijën tuaj, ai mëson që është i vlerësuar dhe se është kënaqësi të kalohet kohë me të.

Është e rëndësishme që gjatë lojës të jepni vëmendjen tuaj të plotë dhe të përfshiheni me të vërtetë në aktivitetin që bëni bashkë. Ndarja e përvojës e bën fëmijën të ndjejë që është i dashur dhe i rëndësishëm. Prandaj buzëqeshni, përfshihuni dhe shijoni çdo moment! /UNICEF/