Me ardhjen e dimrit dhe shkurtimin e ditëve, shumë njerëz vërejnë se ndihen më të lodhur, kanë më pak energji dhe e kanë më të vështirë të zgjohen në mëngjes. Dëshira për të qëndruar më gjatë në shtrat mund të jetë më e theksuar gjatë muajve të ftohtë, por kjo nuk është domosdoshmërisht vetëm pasojë e temperaturave të ulëta.
Një nga arsyet kryesore lidhet me mungesën e dritës natyrale. Gjatë dimrit, ekspozimi ndaj dritës së diellit zvogëlohet, duke ndikuar në ritmin cirkadian, i njohur edhe si ora biologjike e trupit, e cila rregullon ciklin e gjumit dhe zgjimit.
Drita luan rol të rëndësishëm në rregullimin e melatoninës, hormonit që i sinjalizon organizmit se është koha për gjumë. Kur ekspozimi ndaj dritës natyrale është më i vogël, ky ritëm mund të ndryshojë, duke bërë që disa njerëz të ndihen të përgjumur më herët dhe të kenë më shumë vështirësi për t’u zgjuar në mëngjes.
Përveç kësaj, dimri mund të ndikojë edhe në humor. Disa njerëz përjetojnë ndryshime sezonale të humorit, ndërsa të tjerë mund të zhvillojnë çrregullimin afektiv sezonal, një formë depresioni që shfaqet zakonisht gjatë vjeshtës dhe dimrit. Kjo gjendje mund të shoqërohet me lodhje, përgjumje të shtuar, ndryshime në oreks dhe mungesë motivimi.
A kemi vërtet nevojë për më shumë gjumë gjatë dimrit?
Jo domosdoshmërisht. Nevoja për gjumë nuk ndryshon shumë nga një stinë në tjetrën. Për shumicën e të rriturve rekomandohen të paktën shtatë orë gjumë në natë. Megjithatë, disa studime sugjerojnë se kohëzgjatja e gjumit mund të rritet pak gjatë muajve të dimrit, si pasojë e ndryshimeve sezonale në ekspozimin ndaj dritës.
Për të ruajtur një ritëm të shëndetshëm të gjumit, rekomandohet ekspozimi ndaj dritës natyrale gjatë ditës, mbajtja e një orari të rregullt të gjumit, aktiviteti fizik dhe shmangia e përdorimit të telefonit para se të flemë.
Megjithatë, nëse lodhja është e vazhdueshme, ndikon në aktivitetet e përditshme dhe shoqërohet me ndryshime të theksuara të humorit, është e rëndësishme të kërkohet këshillë mjekësore.
Pra, nëse gjatë dimrit ndiheni më të përgjumur se zakonisht, kjo mund të lidhet me mënyrën se si organizmi reagon ndaj ndryshimeve të dritës dhe ritmit biologjik. Por lodhja e vazhdueshme nuk duhet t’i atribuohet automatikisht stinës.
