Krenare Hoti

Artroza e kërdhokullës është një sëmundje degjenerative e nyjës së ijeve (kërdhokullës), ku ndodh konsumimi gradual i kërcit që mbulon kokën e kockës së femurit dhe zgavrën e legenit. Kjo gjendje shkakton dhimbje, ngurtësi dhe kufizon lëvizjet normale të trupit.

Të dish rreth artrozës së kërdhokullës është shumë e rëndësishme për shëndetin e përgjithshëm, veçanërisht për individët që janë në moshë të mesme apo të shtyrë. Kjo sëmundje degjenerative ndikon drejtpërdrejt në nyjën e ijeve dhe mund të kufizojë ndjeshëm lëvizshmërinë dhe cilësinë e jetës.

Për këtë arsye, FamiljaJonë ka intervistuar Dr. Agron Mahmuti, Ortoped/Traumatolog.

Dr. Mahmuti na ka treguar rreth shpeshtësisë së kësaj sëmundjeje, faktorëve të rrezikut, simptomave e shumë informata të tjera.

Më poshtë, gjeni intervistën e plotë.

1. Çka është artroza e kërdhokullës?

Artroza e kërdhokullës është sëmundje degjenerative e nyjes së kërdhokullës që shkakton dëmtim progresiv të kërcit artikular në kokën e femurit dhe acetabulum.

2. Sa shpesh ndodh kjo sëmundje?

Shpeshtësia e sëmundjës së kërdhollukës është rreth 88 raste për 100.000 banorë.

3. Cilët janë faktorët e rrezikut të sëmundjes së kërdhokullës?

Faktorët e rrezikut të kësaj sëmundjeje ndahen në dy grupe, të modifikueshme dhe të pa modifikueshëm.

Të modifikueshëm përshijnë:

– Lëndimet traumatike që kanë shtrirje në nyje;

– Dobësimi i masës muskulare;

– Aktivitetet e rënda punuese dhe sportive që rrisin stresin në nyjen e kërdhokullës.

Të pa modifikueshëm

– Gjina femërore > mashkullore;

– Mosha (me rritjen e moshës rritet shpeshtësia);

– Predispozita gjenetike;

– Çrregullimet zhvillimore dhe të fituara të kërdhokullës si displazioni i kërdhokullës, sëmunjda e Perthesit, dëmtimet në zonen e rritjes etj.

4. Cilat janë simptomat e kësaj sëmundjeje?

Simptomat kryesore të kësaj sëmundjeje përfshijnë dhimbjen që mund të shfaqet ne aktivitet apo në fazat e avancuara edhe në qetësi, calimi gjatë ecjes, kufizim i shkallës së lëvizjes në nyje, instabiliteti i nyjes etj.

5. Cilat janë metodat diagnostikuese ?

Diagnostikimi : bëhet duke përfshirë të dhënat nga anamneza e pacientit, ekzaminimi klinik duke u plotësuar edhe nga ekzaminimet radiologjike si Rentgeni, CT, Rezonanca magnetike etj.

6. Cilat janë disa nga format e trajtimit të artrozës së kërdhokullës?

Disa nga format e trajtimit përshijnë trajtimin jokirurgjik dhe kirurgjik.

Jokirurgjik:

• Trajtimi medikamentoz me anitiinflamator josteroid dhe eventual edhe tramadol;
• Përdorimi i mjeteve ndihmëse gjatë ecjes;
• Reduktimi i peshës;
• Terapia fizikale që përfshin edhe programet e edukimit të pacientit;
• Injektimi intraartikular i injeksionve me kortikosteroid.

Kirurgjik:

• Në shumicën e rasteve në stadet e avansuara të sëmundjes konsiston në vendosjen e protezes totale të kërdhokullës.

Në fotot poshtë mund të shihni osteoartritin e kërdhokullës para dhe pas trajtimit.