Pas disa shkrimeve të publikuara dje, ku thuhej se xhandarmëria serbe është futur në territorin e Republikës së Kosovës, saktësisht në Karaqevë, vjen edhe reagimi i Policisë së Kosovës.

Përmes një njoftimi për media, Policia e Kosovës demanton këto lajme duke thënë se, në bazë të informacioneve zyrtare që ata kanë, nuk bëhet fjalë për futje të xhandarmërisë serbe në Kosovë, por, sic thanë,  kemi të bëjmë me realizim të një takimi zyrtar në cilësi të takimeve të rregullta.

“SQARIM PËR MEDIA

Prishtinë, 08 prill 2021

Policia e Kosovës (PK) me qëllim, informimin e drejt të opinionit publik lidhur me disa shkrime të publikuara me 07.04.2021 në disa media ku potencohej se, xhandarmëria serbe një ditë më parë ka hyrë në territorin e Republikës së Kosovës në zonën e Karaçevës, ju informon dhe njëherit sqaron se;

Policia e Kosovës si institucion i zbatimit të ligjit në të gjitha rastet ndërmerr të gjitha veprimet konform Kushtetutës së Kosovës, ligjeve në fuqi dhe konform autorizimeve ligjore që ka, për të garantuar rendin dhe qetësinë publike, përfshirë edhe mbikëqyrjen dhe patrullimet kufitare sipas mandatit të saj.

Shkrimet e publikuara nuk qëndrojnë dhe nuk i përkasin ndonjë informacioni zyrtar, pasi në datën 06.04.2021, është mbajtur një takim zyrtar në mes të përfaqësuesve të KFOR-it, në përbërje prej KFOR-it Amerikan, Turk dhe palës serbe.

Referuar informacioneve zyrtare lidhur me zhvillimet e realizuara në terren vlerësohet se nuk kemi të bëjmë me hyrje të xhandarmerisë serbe në territorin e Republikës së Kosovës, por kemi të bëjmë me realizim të një takimi zyrtar në cilësi të takimeve të rregullta.

Prandaj konsiderojmë se opinioni publik duhet të informohet drejt dhe korrekt, Policia e Kosovës do të vazhdoj të jetë e përkushtuar në realizimin e detyrave dhe përgjegjësive të saja ligjore ndaj qytetarëve dhe vendit, si dhe informimin e drejt të opinionit publik”, ishte reagimi i Policisë së Kosovës.