Një studim i gjerë amerikan, që përfshiu rreth 2.5 milionë fëmijë, nuk ka gjetur lidhje mes vaksinës kundër fruthit, shytave dhe rubeolës (MMR) dhe autizmit.
Në një kohë kur rastet e fruthit po shtohen në Shtetet e Bashkuara, hulumtimi i ri, i publikuar në revistën shkencore The Pediatric Infectious Disease Journal, sjell prova të tjera të fuqishme që kundërshtojnë një nga mitet më të përhapura dhe më këmbëngulëse në mjekësi.
Studiuesit, të udhëhequr nga një mjek i UW Medicine, analizuan të dhënat shëndetësore të 2,560,035 fëmijëve amerikanë. Ata krahasuan fëmijët që kishin marrë dozën e parë të vaksinës MMR para moshës dyvjeçare me ata që ende nuk e kishin marrë këtë vaksinë.
Fëmijët u ndoqën deri në moshën tetëvjeçare dhe rezultatet ishin të qarta: vaksinimi me MMR nuk u shoqërua me rritje të rrezikut për autizëm.
Për t’i përforcuar gjetjet, studiuesit shqyrtuan edhe një dozë përforcuese të vaksinës kundër pneumokokut, e cila jepet në kuadër të vaksinimit rutinë. Edhe kjo analizë dha rezultate të ngjashme dhe qetësuese.
Keqkuptimi që lidh vaksinën MMR me autizmin e ka zanafillën në një studim të diskutueshëm të vitit 1998, i cili më vonë u tërhoq nga botimi. Hulumtimet e kryera gjatë dekadave, që kanë përfshirë miliona fëmijë, vazhdimisht nuk kanë gjetur prova për një lidhje shkakësore mes kësaj vaksine dhe autizmit.
Ndërkohë, rikthimi i fruthit po shkakton shqetësim. Sipas Qendrave për Kontrollin dhe Parandalimin e Sëmundjeve (CDC), deri më 22 tetor 2026, në Shtetet e Bashkuara ishin regjistruar 4,588 raste të konfirmuara të fruthit. Këto shifra nxjerrin në pah rëndësinë e vaksinimit kundër kësaj sëmundjeje shumë ngjitëse.
Sa i përket situatës në Kosovë, sipas të dhënave të publikuara në profilin zyrtar në Facebook të IKShPK-së, gjatë periudhës 16 prill – 25 tetor 2026 janë konfirmuar gjithsej 242 raste me fruth, prej të cilave 18 janë regjistruar gjatë javës së fundit. Mbi 95% e rasteve të konfirmuara i përkasin personave të pavaksinuar me vaksinën MMR, që mbron nga fruthi, parotiti dhe rubeola.
Megjithëse asnjë studim vëzhgues nuk mund të përjashtojë çdo burim të mundshëm të njëanshmërisë, ky hulumtim në shkallë të gjerë i shtohet tërësisë së provave të fuqishme shkencore që tregojnë se vaksina MMR nuk shkakton autizëm.
