Për herë të parë, shkencëtarët kanë identifikuar mekanizmin biologjik që shpjegon pse obeziteti shkakton inflamacion të pakontrolluar në organizëm, një proces që lidhet me diabetin e tipit 2, sëmundjet e mëlçisë dhe probleme të tjera serioze shëndetësore.

Studimi, i publikuar në revistën prestigjioze Science, analizoi qelizat imunitare të njerëzve me peshë normale dhe atyre me obezitet. Studiuesit zbuluan se tek personat obezë aktivizohet në mënyrë të tepruar një kompleks proteinik i njohur si NLRP3, i cili nxit prodhimin e molekulave inflamatore në trup.

Sipas autorëve, kjo aktivizim i tepërt krijon një gjendje inflamacioni kronik që vazhdon edhe kur nuk ka infeksion apo sëmundje akute. Ky proces me kalimin e kohës mund të dëmtojë indet dhe organet, duke rritur rrezikun për diabet, sëmundje të mëlçisë dhe probleme kardiovaskulare.

Studiuesit theksojnë se zbulimi mund të hapë rrugën për zhvillimin e trajtimeve të reja që synojnë drejtpërdrejt këtë mekanizëm inflamator. Nëse arrihet të bllokohet aktiviteti i NLRP3, mund të reduktohen pasojat e shumta shëndetësore që lidhen me obezitetin.

Ekspertët e përshkruajnë studimin si një hap të rëndësishëm drejt kuptimit më të mirë të ndikimit që pesha e tepërt ka në organizëm. Ata theksojnë se obeziteti nuk është thjesht çështje e peshës trupore, por një gjendje që prek sistemin imunitar dhe funksionimin e shumë organeve.

Megjithëse nevojiten studime të tjera për të zhvilluar terapi të reja, zbulimi mund të ndihmojë në krijimin e strategjive më efektive për parandalimin dhe trajtimin e sëmundjeve të lidhura me obezitetin./FamiljaJone