Princesha Anne bëri një vizitë të papritur në Ukrainë të martën për të nxjerrë në pah “përvojat traumatike të fëmijëve që jetojnë në vijën e parë të konfliktit”, sipas Pallatit Buckingham.
Ajo la një arush lodër në një memorial për fëmijët që kanë humbur jetën që nga pushtimi i plotë rus dhe bisedoi me të rinj që thuhet se janë marrë nga shtëpitë e tyre nga forcat ruse, raporton BBC.
Gjithashtu Anne diskutoi për mbështetjen e Britanisë së Madhe për Ukrainën dhe rezistencën e saj të vazhdueshme me presidentin Volodomyr Zelensky.
Kjo vizitë zyrtare, e organizuar në kërkesë të Ministrisë së Jashtme, ndodhi vetëm disa javë pasi djali i motrës së saj, Princi Harry, vizitoi veteranët e plagosur gjatë një vizite të papritur në Kiev.
Anne, e cila është Anne, e cila është motra e Mbretit të Mbretërisë së Bashkuar, nderoi fëmijët në memorialin për fëmijët së bashku me zonjën e parë Olena Zelenska, e cila hapi këtë vend në qytetin verilindor të Kharkivit.
Princesha vizitoi gjithashtu Qendrën për Mbrojtjen e të Drejtave të Fëmijëve, e krijuar gjatë konfliktit për të mbështetur të rinjtë e prekur nga lufta, ku bisedoi me fëmijë që janë ribashkuar me familjet e tyre dhe me stafin që punon pa pushim për të ndihmuar më shumë të rinj të kthehen.
Kiev vlerëson se të paktën 19,500 fëmijë ukrainas janë deportuar dhe zhvendosur me forcë nga shtëpitë e tyre drejt Rusisë dhe territoreve të pushtuara nga Rusia që nga shkurti i vitit 2022.
Derisa vetëm 1,605 janë kthyer deri tani, sipas bazës së të dhënave të qeverisë “Fëmijët e Luftës”.
Gjyqi Ndërkombëtar Penal lëshoi një urdhër arresti për presidentin rus Vladimir Putin dhe Komisioneren për të Drejtat e Fëmijëve, Maria Lvova-Belova, në vitin 2023 për deportimin e paligjshëm të fëmijëve.
Rusia mohon akuzat dhe thotë se ka mbrojtur fëmijët duke i larguar nga zona e luftës për sigurinë e tyre.
Vizita e princeshës Anne vjen pak javë pasi Britania njoftoi sanksione të reja kundër atyre që mbështesin përpjekjet e supozuara “për deportimin me forcë dhe indoktrinimin” e fëmijëve ukrainas.
Princesha gjithashtu takoi gra policë dhe oficerë të forcave të armatosura që punojnë për mbrojtjen e grave dhe fëmijëve, bisedoi me veteranë të plagosur dhe persona me “trauma të lidhura me konfliktin” në një qendër rehabilitimi, dhe vizitoi Katedralen Shën Sofia në Kiev.
Ajo vizitoi gjithashtu Ekspozitën Kulturore të Khersonit, e cila tregon historinë e qytetit jugor të rimarrë nga forcat ukrainase në nëntor të vitit 2022 dhe që Pallati e përshkruan si “një simbol të forcës, rezistencës dhe luftës së Ukrainës”.
Kjo është vizita e dytë e një anëtari të familjes mbretërore në vend brenda pak më shumë se një muaji, pasi Duka i Sussex-it vizitoi Kievin në mes të shtatorit.
Anëtarë të tjerë të familjes mbretërore kanë treguar mbështetje për Ukrainën që nga fillimi i luftës më shumë se tre vjet më parë, përfshirë mbretin, i cili mirëpriti Zelenskyn në pronën e tij në Sandringham, Norfolk, në mars.
Ai gjithashtu përmendi konfliktin gjatë vizitës së fundit shtetërore të presidentit amerikan Donald Trump në Mbretërinë e Bashkuar, duke thënë: “Sot, ndërsa tirania kërcënon përsëri Evropën, ne dhe aleatët tanë qëndrojmë së bashku në mbështetje të Ukrainës për të penguar agresionin dhe për të siguruar paqen.”
Princi i Uellsit takoi refugjatë ukrainas gjatë një vizite dyditore në Estoni në mars, ku tha se rezistenca e tyre ishte “e jashtëzakonshme”. /BBC/
