Ilaçi i parë që mund të vonojë shfaqjen e diabetit të tipit 1 po vihet në dispozicion nga sistemi shëndetësor publik (NHS) në Angli dhe Uells.

Teplizumab është një formë imunoterapie që mund t’u japë pacientëve rreth tre vite shtesë para se të shfaqin simptomat e sëmundjes dhe të kenë nevojë për trajtim të përhershëm me insulinë.

Institucioni përgjegjës për vlerësimin e barnave në NHS e ka cilësuar këtë vendim si “vërtet emocionues”, ndërsa qindra fëmijë dhe të rinj pritet të përfitojnë çdo vit.

Diabeti i tipit 1 mund të zhvillohet në çdo moshë, por më shpesh diagnostikohet gjatë viteve të hershme të adoleshencës.

Organizatat që përfaqësojnë pacientët e konsiderojnë ndikimin e mundshëm të këtij ilaçi si “historik”, pas dekadash pune për ta sjellë atë në këtë fazë.

“Nëse do të ishte fëmija juaj ose dikush që e doni, do të dëshironit të bënit gjithçka të mundur për t’i dhënë më shumë vite pa barrën e përditshme të menaxhimit të kësaj sëmundjeje të pandërprerë”, thotë Karen Addington, drejtoreshë ekzekutive e organizatës bamirëse Breakthrough T1D.

“Tani kemi një trajtim që mund ta bëjë këtë të mundur.”

Diabeti i tipit 1 shkaktohet kur sistemi imunitar i organizmit fillon të sulmojë qelizat në pankreas që prodhojnë insulinë.

Ai ndryshon nga diabeti i tipit 2, i cili shpesh – por jo gjithmonë – lidhet me mbipeshën.

Personat me diabet të tipit 1 duhet të monitorojnë vazhdimisht nivelin e glukozës në gjak dhe të marrin insulinë, qoftë përmes injeksioneve ose pompave të insulinës, për të zëvendësuar hormonin që trupi i tyre nuk mund ta prodhojë më në sasi të mjaftueshme.