Rënia e flokëve është një shqetësim i shpeshtë te gratë dhe shpeshherë lidhet automatikisht me mungesën e vitaminave. Për këtë arsye, shumë gra u drejtohen suplementeve ushqimore me shpresën se do ta ndalojnë këtë proces. Megjithatë, rënia e flokëve mund të ketë shumë shkaqe dhe jo gjithmonë lidhet me mungesën e vitaminave apo mineraleve.

Humbja e një sasie të caktuar të flokëve çdo ditë është normale. Sipas Akademisë Amerikane të Dermatologjisë (AAD), është normale të bien rreth 50 deri në 100 fije floku në ditë. Shqetësimi fillon kur rënia bëhet më e madhe se zakonisht, flokët fillojnë të rrallohen dukshëm ose shfaqen zona pa flokë në lëkurën e kokës.

Por cilat janë arsyet që mund të fshihen pas këtij problemi?

1. Çrregullimet hormonale

Hormonet luajnë rol të rëndësishëm në ciklin e rritjes së flokëve. Ndryshimet hormonale gjatë shtatzënisë, pas lindjes, gjatë menopauzës ose në rastet e çrregullimeve hormonale mund të ndikojnë në dendësinë dhe rritjen e flokëve.

Një prej gjendjeve që mund të shoqërohet me rënie të flokëve është sindroma e vezoreve policistike (PCOS). Kjo gjendje mund të shkaktojë rritje të nivelit të androgjeneve, hormoneve që në sasi të larta mund të ndikojnë në rrallimin e flokëve, veçanërisht në pjesën e sipërme të kokës.

2. Stresi fizik dhe emocional

Stresi i konsiderueshëm, një operacion, një sëmundje me temperaturë të lartë, humbja e madhe në peshë ose lindja mund të shkaktojnë një formë të rënies së flokëve të njohur si telogen effluvium.

Në këtë gjendje, një numër më i madh i folikulave të flokëve kalojnë njëkohësisht në fazën e pushimit, duke bërë që flokët të fillojnë të bien më shumë se zakonisht.

Rënia zakonisht vërehet dy deri në tre muaj pas ngjarjes që e ka shkaktuar. Në shumë raste, flokët fillojnë të rikuperohen pasi eliminohet faktori nxitës, megjithëse procesi mund të zgjasë disa muaj.

3. Mungesa e hekurit dhe probleme të tjera ushqyese

Mungesa e hekurit është një prej faktorëve që mund të kontribuojnë në rënien e flokëve, veçanërisht te gratë me menstruacione të bollshme ose ato që nuk marrin mjaftueshëm hekur përmes ushqimit.

Përveç hekurit, mungesa e proteinave, zinkut dhe disa lëndëve të tjera ushqyese mund të ndikojë në shëndetin e flokëve.

Megjithatë, marrja e suplementeve pa konstatuar paraprakisht ndonjë mungesë nuk rekomandohet. Edhe teprica e disa vitaminave dhe mineraleve, përfshirë vitaminën A dhe selenin, mund të shkaktojë rënie të flokëve.

4. Problemet me gjëndrën tiroide

Gjëndra tiroide ndihmon në rregullimin e metabolizmit dhe ndikon në shumë funksione të organizmit, përfshirë ciklin e rritjes së flokëve.

Si hipotiroidizmi, ashtu edhe hipertiroidizmi mund të shkaktojnë rrallim ose rënie të flokëve. Në këto raste, mund të shfaqen edhe simptoma të tjera, si lodhja, ndryshimet në peshë, ndjeshmëria ndaj të ftohtit ose nxehtësisë dhe ndryshimet në ciklin menstrual.

5. Rënia e flokëve sipas modelit femëror

Një tjetër shkak është alopecia androgjenetike, e njohur edhe si rënia e flokëve sipas modelit femëror.

Kjo gjendje lidhet me faktorë gjenetikë dhe ndjeshmërinë e folikulave të flokëve ndaj hormoneve androgjene. Zakonisht manifestohet me rrallim gradual të flokëve në pjesën e sipërme të kokës dhe zgjerim të vijës së ndarjes së flokëve.

Mund të shfaqet në mosha të ndryshme, por bëhet më e shpeshtë me kalimin e viteve dhe gjatë periudhës së menopauzës.

Kur duhet të konsultoheni me dermatologun?

Nëse rënia e flokëve është e papritur, e vazhdueshme, shoqërohet me rrallim të dukshëm ose shfaqen zona të zbrazëta në lëkurën e kokës, rekomandohet konsultimi me dermatologun.

Varësisht nga simptomat dhe historia shëndetësore, mjeku mund të rekomandojë analiza të gjakut për të kontrolluar nivelin e hekurit dhe ferritinës, funksionin e gjëndrës tiroide apo faktorë të tjerë që mund të ndikojnë në rënien e flokëve.

Trajtimi varet nga shkaku. Në disa raste mund të nevojiten ndryshime në ushqyerje ose trajtimi i një problemi hormonal, ndërsa në raste të tjera dermatologu mund të rekomandojë terapi specifike, si minoxidil.

Në përfundim, rënia e flokëve te gratë nuk duhet trajtuar gjithmonë si problem i mungesës së vitaminave. Ajo mund të jetë shenjë e ndryshimeve hormonale, problemeve të tiroides, stresit, faktorëve gjenetikë apo gjendjeve të tjera shëndetësore. Identifikimi i shkakut është hapi i parë drejt trajtimit të duhur.