Sipas një sondazhi që është publikuar të martën e 3 marsit, dhuna fizike dhe seksuale prek rreth një të tretën e grave në Bashkimin Evropian gjatë jetës së tyre, por shumica e incidenteve nuk raportohet, raporton Reuters.
Rezultatet e sondazhit, të kryer nga Agjencia e Bashkimit Evropian për të Drejtat Themelore (FRA) dhe nga Instituti Evropian për Barazinë Gjinore, treguan se vetëm 11.3% e grave raportuan dhunën fizike ose seksuale nga jo-partnerët te policia, dhe vetëm 6.1% raportuan dhunën nga partnerët intimë.
Arsye të zakonshme për mos-raportimin e dhunës përfshinin turpin, fajësimin e vetes, frikën dhe mosbesimin te autoritetet ligjore. Gjithashtu, mungesa e njohurive ose qasjes në shërbime mbështetëse u identifikua si faktor kontribuues.
Rreth 30.7% e grave në gjithë bllokun thanë se kishin përjetuar dhunë, një ulje e lehtë krahasuar me 33% që ishte regjistruar në sondazhin e parë të tillë në vitin 2012. Studimi gjithashtu theksoi forma të tjera të abuzimit të përhapur, përfshirë abuzimin psikologjik, ekonomik dhe atë online.
“Dhuna ndaj grave është një shkelje e të drejtave themelore,” tha Drejtoresha e FRA, Sirpa Rautio. “Shtetet anëtare kanë detyrime të qarta për të parandaluar dhunën, për të mbrojtur viktimat dhe për të siguruar qasje në drejtësi, dhe këto gjetje tregojnë se ende ka punë urgjente për t’u bërë.”
Paradoksi nordik
Normat e përhapjes ndryshuan ndjeshëm, nga 57.1% në Finlandë deri në 11.9% në Bullgari.
Vendet nordike fqinjë të Finlandës, të njohura për barazinë e lartë gjinore, gjithashtu treguan nivele të larta dhune, me 52.5% të grave në Suedi dhe 47.5% në Danimarkë që përjetuan dhunë, ndërsa vendet me barazi më të ulët në jug tregojnë dinamikë më komplekse raportimi.
Kjo dallim, i quajtur “paradoksi nordik”, mund të reflektojë ndryshime reale në përvojat e grave ose sjellje të ndryshme raportimi dhe perceptime të ndryshme për dhunën në lidhje me marrëdhënie seksuale midis vendeve, sipas studiuesve.
Sondazhi i parë i FRA mbi dhunën ndaj grave në BE në vitin 2012 tregoi të njëjtin paradoks. Studimi i ri u bazua në intervista me afërsisht 115,000 gra të moshës 18 deri 74 vjeç, të kryera midis shtatorit 2020 dhe marsit 2024.
Komisioni Evropian shprehu shqetësim për gjetjet e sondazhit.
“Shkalla e lartë e dhunës së papër raportuar tregon se sistemet duhet të përmirësohen dhe viktimat duhet të mbështeten,” tha ai, duke shtuar se lufta kundër dhunës ndaj grave dhe dhunës në familje është “një prioritet kryesor për BE-në.” /Reuters/
