Fillimi i kopshtit është një moment i rëndësishëm si për fëmijën tuaj, ashtu edhe për ju. Të mësuarit për të kaluar kohë të ndarë mund të jetë një ndryshim i vështirë, por nisja e rrugëtimit të parë të të nxënit është gjithashtu emocionuese. UNICEF jep tetë këshilla që mund ta bëjnë kalimin drejt kopshtit më të butë dhe më të qetë.

1. Vizitoni kopshtin së bashku
Nëse keni mundësi, planifikoni të shkoni së bashku në kopshtin e ri të fëmijës tuaj përpara ditës së parë. Luani bashkë në oborr dhe shikoni klasën. Kështu, kur të fillojë dita e parë, kopshti do të jetë një vend i njohur për të.

2. Krijoni miqësi të reja
Nëse është e mundur, organizoni një takim loje me fëmijë nga klasa e fëmijës tuaj. Kjo do t’i ndihmojë të njihen me njëri tjetrin përpara se të nisë kopshti.

3. Luani kopsht në shtëpi
Përdorni lojën imagjinare për ta ndihmuar fëmijën tuaj të mësohet me idenë e kopshtit. Ndërroni rolet dhe luani rutina të ndryshme, si koha e tregimeve, këndimi i këngëve dhe koha e gjumit. Mund ta lini edhe fëmijën të jetë mësuesi. Kjo e ndihmon ta shohë kopshtin si një vend argëtues dhe ul ankthin në ditën e parë.

4. Ktheni përgatitjen në lojë
Ushtrohuni me mbylljen e kopçave dhe zinxhirëve, vënien e çantës së shpinës dhe varjen e xhaketës në grep. Mund ta ktheni veshjen e këpucëve në lojë dhe të shihni se kush i vesh më shpejt.

5. Ndani përvojën tuaj
Tregojini fëmijës histori nga koha kur ju shkuat për herë të parë në shkollë, si u ndjetë dhe çfarë kujtimesh të veçanta krijuat. Nëse keni mundësi, gjeni fotografi tuajat nga kopshti ose të të rriturve të tjerë që fëmija i njeh dhe bisedoni së bashku për to.

6. Krijoni një rutinë të re
Filloni të praktikoni orarin e ri të gjumit dhe zgjimit disa javë përpara fillimit të kopshtit. Zgjidhni një orë gjumi që siguron pushim të mjaftueshëm dhe një orë zgjimi që ju lejon të mos nxitoheni në mëngjes. Kjo ju jep kohë të dyve të përshtateni. Nëse mundeni, mund të krijoni edhe një traditë të re, si zgjedhja e rrobave një natë më parë dhe ngrënia e mëngjesit së bashku.

7. Dëgjoni fëmijën tuaj
Pyeteni fëmijën për ndjenjat e tij rreth shkuarjes në kopsht dhe sigurojeni se është normale të ndihet i emocionuar, i shqetësuar ose të përjetojë emocione të tjera. Fillimi i diçkaje të re mund të duket i frikshëm dhe i madh, por mund të jetë edhe shumë argëtues. Sigurojeni se ju do të jeni aty për ta marrë në fund të ditës dhe flisni së bashku për këto rutina.

8. Bëni një plan për ndarjen
Të thuash “mirëupafshim” mund të jetë e vështirë si për ju, ashtu edhe për fëmijën. Kur të vijë ai moment, përpiquni që ndarja të jetë e shkurtër dhe pozitive. Sigurojeni fëmijën se do të takoheni sërish shumë shpejt. Mund të krijoni edhe një ritual të veçantë që e qetëson, si këndimi i një kënge së bashku ose një përshëndetje speciale me duar.