Gjatë muajve të verës, kur temperaturat janë të larta dhe trupi humbet më shumë lëngje përmes djersitjes, ekspertët rekomandojnë t’i kushtohet vëmendje edhe marrjes së kaliumit. Ky mineral është një elektrolit thelbësor që ndihmon në funksionimin normal të qelizave dhe luan rol të rëndësishëm në ruajtjen e ekuilibrit të lëngjeve në organizëm, shkruan HuffPost.
Sipas Instituteve Kombëtare të Shëndetit (NIH), gratë e rritura kanë nevojë për rreth 2,600 miligramë kalium në ditë, ndërsa burrat për rreth 3,000 miligramë.
Dietologia Sandra Zhang nga Qendra Frances Stern për Ushqyerje në Qendrën Mjekësore Tufts shpjegon se kaliumi ndihmon në funksionimin e muskujve, transmetimin e sinjaleve nervore, rregullimin e presionit të gjakut, ekuilibrin e lëngjeve dhe ritmin normal të zemrës. Sipas saj, nivelet e ulëta të kaliumit mund të shkaktojnë edhe lodhje.
Edhe Laura Acosta, profesoreshë e asociuar në Departamentin e Shkencave Ushqimore dhe Ushqyerjes Njerëzore në Universitetin e Floridës, thekson se kaliumi punon së bashku me natriumin për të ruajtur ekuilibrin e lëngjeve në organizëm dhe është thelbësor për tkurrjen normale të muskujve, përfshirë muskulin e zemrës.
Ajo paralajmëron se nivelet shumë të ulëta ose shumë të larta të kaliumit në gjak mund të shkaktojnë aritmi, ose çrregullime të ritmit të zemrës, ndërsa në raste të rënda mund të çojnë edhe në arrest kardiak.
Mungesa e kaliumit shoqërohet shpesh me dehidratimin dhe mund të shfaqet me simptoma si lodhja, dobësia muskulore, ngërçet, dhimbjet e barkut dhe kapsllëku. Në raste më serioze mund të shfaqen rrahje të parregullta të zemrës, presion i lartë i gjakut dhe komplikime të tjera kardiake.
Ekspertët theksojnë se shumica e njerëzve mund ta marrin sasinë e nevojshme të kaliumit përmes një diete të ekuilibruar. Burime të mira janë kajsitë e thata, thjerrëzat, patatet e pjekura, kungulli, bananet, lëngu i portokallit, qumështi dhe mishi i pulës. Pas djersitjes së tepërt rekomandohen gjithashtu ushqime si avokado, uji i kokosit, kosi, fasulet, thjerrëzat dhe qumështi i sojës.
Nëse shfaqen simptoma të vazhdueshme si lodhje e pazakontë, dobësi muskulore, palpitacione ose dhimbje barku, specialistët këshillojnë konsultimin me mjekun në vend të vetëdiagnostikimit. Mjeku mund të rekomandojë analiza gjaku për të kontrolluar nivelet e kaliumit dhe të përcaktojë nëse simptomat lidhen me këtë mungesë apo me një problem tjetër shëndetësor.
Ekspertët paralajmërojnë gjithashtu se suplementet e kaliumit nuk duhet të merren pa këshillën e mjekut. Edhe pse mungesa e këtij minerali mund të jetë problematike, nivelet shumë të larta të kaliumit mund të jenë po aq të rrezikshme për shëndetin, veçanërisht për zemrën.
