Një spital në Spanjë ka realizuar një arritje të rëndësishme mjekësore, duke kryer transplantimin e parë në botë të fytyrës me inde nga një dhurues që kishte përfituar vdekjen me asistencë mjekësore, një procedurë e ligjshme në vend që nga viti 2021.

Operacioni u krye në Spitalin Universitar Vall d’Hebron në Barcelonë për një pacient që kishte pësuar dëmtime të rënda të indeve të fytyrës për shkak të një infeksioni, i cili kishte komprometuar funksione thelbësore si frymëmarrja, të ushqyerit dhe të folurit.

Transplantimi mundësoi riconstruimin e pjesshëm të fytyrës dhe fillimin e rikuperimit funksional të pacientit, shkruan Euronews përcjell Gazeta Shneta.

Dhuruesja kishte dhënë më parë pëlqimin për dhurimin e organeve dhe indeve pas vdekjes me asistencë mjekësore, gjë që i mundësoi ekipit mjekësor të përgatitej në detaje për operacionin kompleks, duke përfshirë përputhjen e saktë të indeve të fytyrës dhe përgatitjen kirurgjikale.

Operacioni u udhëhoq nga Dr. Joan Pere Barret, shefi i Kirurgjisë Plastike dhe të Djegurave në Vall d’Hebron, dhe përfshiu rreth 100 profesionistë shëndetësorë, përfshirë kirurgë, anesteziologë, infermierë dhe specialistë të mikrokirurgjisë, imunitetit dhe shëndetit mendor.

Spitali theksoi se procedura u realizua sipas protokolleve rigoroze etike dhe ligjore, dhe falënderoi dhuruese dhe familjen e saj për kontributin që bëri të mundur këtë avancim të rëndësishëm mjekësor.

Transplantimi përfshin lëkurë, muskuj, nerva dhe struktura kockore, si dhe një trajtim të vazhdueshëm me medikamente imunosupresive për të parandaluar refuzimin e indeve, dhe kërkon ndjekje të gjatë pas operacionit.