Një studim i ri klinik sugjeron se probiotikët – bakteret e dobishme për shëndetin e zorrëve – mund të ndihmojnë në lehtësimin e simptomave të depresionit dhe ankthit tek të moshuarit kur përdoren së bashku me trajtimin standard me antidepresivë, raporton FamiljaJone.

Në studim morën pjesë 58 persona mbi moshën 60 vjeç me depresion të moderuar. Të gjithë vazhduan terapinë e zakonshme me antidepresivë, ndërsa gjysma morën çdo ditë një suplement probiotik për 12 javë dhe gjysma tjetër një placebo.

Rezultatet treguan se të dy grupet përmirësuan gjendjen e tyre, por pjesëmarrësit që morën probiotikë shfaqën ulje më të madhe të simptomave të depresionit dhe ankthit krahasuar me grupin placebo. Studiuesit analizuan gjithashtu ndryshimet në bakteret e zorrëve dhe një proteinë të trurit të quajtur BDNF, e cila lidhet me funksionimin dhe mbijetesën e qelizave nervore.

Sipas autorëve, gjetjet mbështesin teorinë e njohur si boshti zorrë-tru, sipas së cilës mikroorganizmat që jetojnë në zorrë mund të ndikojnë në humor, sjellje dhe shëndetin mendor përmes mekanizmave biologjikë të ndryshëm.

Megjithatë, ekspertët theksojnë se bëhet fjalë për një studim pilot me numër të vogël pjesëmarrësish. Ata paralajmërojnë se probiotikët nuk duhet të zëvendësojnë trajtimin e përshkruar nga mjeku, por mund të jenë një terapi plotësuese premtuese nëse rezultatet konfirmohen nga studime më të mëdha.

Autorët kanë bërë të ditur se tashmë po planifikojnë një provë klinike më të gjerë për të vlerësuar nëse probiotikët mund të bëhen pjesë e trajtimit standard të depresionit tek të moshuarit.

Burimi: Journal of the American Geriatrics Society, Raporton FamilaJone