Çfarë është më e mira për mëngjesin para provimit?

Studimet tregojnë se studentët që hanë mëngjes performojnë më mirë në provime. Pra, mëngjesi është shumë i rëndësishëm në ditën e provimit, raporton BBC.

Karbohidratet si tërshëra (porridge) ose buka integrale japin energji të qëndrueshme gjatë kohës së provimit. Nëse i kombinoni me proteina si kos ose vezë, do të ndiheni më të ngopur për më gjatë dhe do të keni përqendrim më të mirë.

Shtimi i salmonit të tymosur mund të sjellë edhe përfitime nga omega-3, të cilat lidhen me shëndetin e trurit dhe funksionin njohës.

A ndihmon uji në performancën gjatë provimit?

Po. Hidratimi është një nga mënyrat më të thjeshta për të mbajtur përqendrimin.

Edhe dehidratimi i lehtë mund të shkaktojë lodhje dhe dhimbje koke, duke ulur aftësinë për t’u përqendruar. Nëse lejohet, është mirë të keni me vete një shishe ujë gjatë provimit.

Studime me studentë kanë treguar se ata që pinin ujë gjatë provimeve kishin performancë pak më të mirë se ata që nuk pinin fare.

Autoritetet shëndetësore rekomandojnë konsumimin e 6 deri në 8 gota lëngje në ditë, ku përfshihen edhe qumështi dhe sasi të vogla lëngjesh frutash.

Ushqimet që ndihmojnë përqendrimin

Një dietë e balancuar është shumë e rëndësishme gjatë përgatitjes për provime. Nuk ekziston një ushqim i vetëm “magjik”, por shumëllojshmëria është çelësi.

Acidet yndyrore omega-3 lidhen me shëndetin e trurit dhe gjenden te peshqit e yndyrshëm si salmoni, sardelet, toni, trofta dhe skumbri.

Peshku gjithashtu është burim i mirë proteinash, të cilat ndihmojnë në ndjenjën e ngopjes dhe mbështesin përqendrimin.

Proteinat gjenden edhe në ushqime si vezët, mishi i pulës dhe tofu, dhe lidhen me funksione të rëndësishme të trurit dhe energjinë mendore.

Fibrat ndihmojnë në ruajtjen e energjisë së qëndrueshme dhe shmangin ndjenjën e urisë. Ato gjenden në bukë integrale, oriz kaf, makarona integrale, fruta dhe perime.

Hekuri gjithashtu është i rëndësishëm për fokusin dhe energjinë, dhe gjendet në mish viçi, bishtajore dhe perime jeshile si spinaqi dhe kale.

Vitamina C ndihmon sistemin imunitar dhe gjendet kryesisht te frutat dhe perimet, sidomos portokalli dhe kivi.

Çfarë duhet të shmangni para provimeve?

Kafeina në sasi të larta, sidomos vonë në mbrëmje, mund të ndikojë negativisht në gjumë. Edhe çokollata e zezë mund të ketë efekt stimulues te disa persona.

Pijet energjike dhe pijet me shumë sheqer nuk rekomandohen, pasi shkaktojnë rritje dhe rënie të shpejtë të energjisë.

Gjithashtu nuk rekomandohet të anashkaloni vaktet, pasi kjo mund të ulë nivelin e sheqerit në gjak dhe të ndikojë në përqendrim.

A ndikon gjumi në performancën në provim?

Po, shumë. Mungesa e gjumit ndikon në kujtesë dhe ngadalëson reagimet, gjë që nuk është e dëshirueshme gjatë një provimi.

Ekspertët theksojnë se gjatë gjumit truri përpunon kujtimet dhe i shndërron ato nga afatshkurtra në afatgjata.

Studentët që flenë rreth 7 orë në natë kanë tendencë të performojnë më mirë se ata që flenë më pak.

Rekomandohet që vakti i fundit të merret të paktën 3 orë para gjumit. Nëse ndiheni të uritur, një snack i lehtë si drithëra integrale ose fruta të thata është një opsion i mirë.

Një gotë qumësht i ngrohtë mund të ndihmojë gjithashtu në relaksim para gjumit. /BBC/