Pushimet janë një mundësi për t’u çlodhur, për të udhëtuar dhe për të kaluar më shumë kohë me familjen dhe miqtë. Por ndryshimi i rutinës, ushqimet më të rënda, konsumimi i alkoolit, më pak aktivitet fizik, temperaturat e larta dhe dehidratimi mund të ndikojnë në shëndetin e zemrës, veçanërisht te personat që kanë sëmundje kardiovaskulare ose faktorë rreziku.

Kjo nuk do të thotë se duhet të hiqni dorë nga kënaqësitë e pushimeve. Disa zakone të thjeshta mund t’ju ndihmojnë të kujdeseni për zemrën pa e kthyer pushimin në një listë kufizimesh.

1. Tregoni kujdes me ushqimin

Gjatë pushimeve, është e zakonshme të hamë më shpesh në restorante, të provojmë ushqime të reja ose të konsumojmë më shumë ushqime të skuqura, të kripura dhe të pasura me sheqer. Por një dietë jo e shëndetshme, mbipesha dhe mungesa e aktivitetit fizik janë ndër faktorët që mund të rrisin rrezikun për sëmundje të zemrës, sipas Qendrave për Kontrollin dhe Parandalimin e Sëmundjeve (CDC).

Kjo nuk do të thotë se duhet të shmangni çdo ushqim që ju pëlqen. Përpiquni të kontrolloni porcionet dhe të përfshini në vaktet tuaja edhe perime, fruta, bishtajore, drithëra të plota dhe burime të shëndetshme proteinash. Kur hani jashtë, mund të zgjidhni ushqime të pjekura ose të ziera në vend të atyre të skuqura dhe të pini ujë në vend të pijeve me shumë sheqer.

2. Mos e teproni me alkoolin

Gjatë pushimeve, konsumimi i alkoolit mund të rritet për shkak të darkave, festave ose daljeve me miqtë. Konsumimi i tepërt i alkoolit mund të ndikojë në presionin e gjakut dhe në ritmin e zemrës. Shoqata Amerikane e Zemrës (AHA) thekson se konsumimi i sasive të mëdha të alkoolit lidhet me rrezik më të lartë për fibrilacion atrial, ndërsa përdorimi i tepërt për një kohë të gjatë mund të lidhet edhe me dëmtimin e muskulit të zemrës.

Prandaj, sa më pak alkool të konsumohet, aq më mirë për shëndetin e zemrës. Nëse pini, shmangni konsumimin e sasive të mëdha në një periudhë të shkurtër dhe pini ujë gjatë ditës. Personat me sëmundje të zemrës ose ata që marrin medikamente duhet të konsultohen me mjekun për konsumin e alkoolit.

3. Qëndroni aktivë, por tregoni kujdes nga nxehtësia

Pushimet mund të jenë një mundësi e mirë për të qenë më aktivë. Ecja, noti, çiklizmi, shëtitjet në natyrë ose edhe një shëtitje pas darkës mund t’ju ndihmojnë të mos kaloni gjithë ditën ulur.

Organizata Botërore e Shëndetësisë (OBSH) rekomandon që të rriturit të kryejnë të paktën 150 minuta aktivitet fizik me intensitet mesatar në javë, ndërsa aktiviteti fizik i rregullt ndihmon në uljen e rrezikut për sëmundje kardiovaskulare. Edhe më pak aktivitet është më mirë sesa qëndrimi plotësisht pasiv.

Megjithatë, gjatë verës duhet të tregoni kujdes me temperaturat e larta. Shmangni aktivitetet fizike intensive në orët më të nxehta të ditës dhe bëni pushime në hije ose në ambiente të freskëta. Pini mjaftueshëm ujë dhe mos prisni të ndieni etje për të pirë.

Kujdes i veçantë nevojitet te personat me sëmundje të zemrës, të moshuarit dhe personat që marrin medikamente të caktuara, pasi nxehtësia dhe humbja e lëngjeve mund të jenë më problematike për ta.

4. Mos harroni zakonet që mbrojnë zemrën gjatë gjithë vitit

Pushimet nuk duhet të nënkuptojnë ndërprerjen e zakoneve të shëndetshme. Nëse merrni medikamente për presionin e gjakut, kolesterolin, diabetin ose sëmundje të zemrës, mos i ndërprisni pa u konsultuar me mjekun. Para udhëtimit, sigurohuni që të keni me vete mjaftueshëm ilaçe për gjithë kohëzgjatjen e pushimeve dhe ruajini sipas udhëzimeve.

Duhani duhet shmangur gjithashtu. Sipas CDC-së, pirja e duhanit është një shkak i rëndësishëm i sëmundjeve kardiovaskulare dhe rrit rrezikun për sëmundje koronare të zemrës, infarkt dhe goditje në tru. Edhe ekspozimi ndaj tymit të duhanit nga të tjerët mund të rrisë rrezikun për sëmundje të zemrës dhe goditje në tru.

Gjumi dhe menaxhimi i stresit janë gjithashtu pjesë e një rutine të shëndetshme. Udhëtimet, ndryshimi i orarit, netët e vona dhe programet e ngarkuara mund t’ju bëjnë të flini më pak. Përpiquni të ruani sa më shumë një ritëm të rregullt të gjumit dhe t’i lini vetes kohë për pushim.

Nëse gjatë pushimeve shfaqen dhimbje ose presion në gjoks, vështirësi në frymëmarrje, djersitje të ftohta, marramendje, të përziera ose dhimbje që përhapet drejt krahut, shpinës, qafës apo nofullës, mos i atribuoni automatikisht simptomat lodhjes, nxehtësisë apo ushqimit të rëndë. Këto mund të jenë shenja të një problemi serioz të zemrës dhe kërkojnë ndihmë urgjente mjekësore. CDC përfshin dhimbjen ose shqetësimin në gjoks, gulçimin, marramendjen, nauzen dhe dhimbjen në pjesën e sipërme të trupit ndër simptomat e mundshme të infarktit.

Në fund, kujdesi për zemrën gjatë pushimeve nuk kërkon përsosmëri. Mund të shijoni ushqimin, të udhëtoni, të kaloni kohë me njerëzit tuaj dhe të pushoni, ndërkohë që bëni disa zgjedhje të thjeshta: hani me masë, pini mjaftueshëm ujë, qëndroni aktivë, kufizoni alkoolin, shmangni duhanin dhe tregoni kujdes ndaj temperaturave të larta sipas artikullit SingleCare.