Hekuri është një mineral thelbësor për organizmin, pasi ndihmon në prodhimin e hemoglobinës – proteinës që transporton oksigjenin në të gjithë trupin. Kur nivelet e hekurit bien, organizmi nuk merr oksigjenin që i nevojitet, gjë që mund të shkaktojë lodhje dhe një sërë simptomash të tjera.

Një nga shenjat më të zakonshme të mungesës së hekurit është lodhja e vazhdueshme. Nëse ndiheni të rraskapitur edhe pas një gjumi të mirë, kjo mund të jetë një shenjë se organizmi juaj nuk po merr mjaftueshëm oksigjen.

Zbehja e lëkurës dhe e pjesës së brendshme të qepallave është një tjetër simptomë e shpeshtë. Mungesa e hemoglobinës bën që lëkura të duket më e zbehtë se zakonisht.

Personat me mungesë hekuri mund të përjetojnë gjithashtu marramendje, dhimbje koke ose vështirësi në përqendrim. Kjo ndodh sepse truri merr më pak oksigjen se sa i nevojitet për të funksionuar normalisht.

Rrahjet e shpejta të zemrës, gulçimi gjatë aktiviteteve të lehta dhe ndjenja e dobësisë janë gjithashtu shenja që nuk duhen neglizhuar, veçanërisht nëse shfaqen pa një arsye të qartë.

Mungesa e hekurit mund të ndikojë edhe në flokë dhe thonj. Rënia e shtuar e flokëve, thonjtë e brishtë ose me formë të pazakontë mund të jenë tregues se organizmit i mungojnë rezervat e hekurit.

Disa persona përjetojnë edhe dëshira të pazakonta për të ngrënë substanca që nuk janë ushqim, si akull, baltë ose letër. Ky fenomen njihet si “pica” dhe mund të lidhet me mungesën e hekurit.

Gratë gjatë moshës riprodhuese, shtatzënat, personat me gjakderdhje të shpeshta, vegjetarianët dhe veganët, si edhe ata me sëmundje që ndikojnë në përthithjen e lëndëve ushqyese, janë më të rrezikuar për të zhvilluar mungesë hekuri.

Nëse dyshoni se mund të keni mungesë hekuri, mos merrni suplemente pa këshillën e mjekut. Diagnoza vendoset përmes analizave të gjakut dhe trajtimi varet nga shkaku i mungesës. Në shumë raste, përmirësimi i ushqyerjes dhe trajtimi i duhur mund të rikthejnë nivelet normale të hekurit dhe të lehtësojnë simptomat.