Kur jeni me grip apo virozë, trupi kërkon më shumë gjumë, por ekspertët paralajmërojnë se edhe pushimi i tepërt mund ta ngadalësojë rikuperimin.

Kur sëmureni, është normale të ndiheni të lodhur dhe të dëshironi të kaloni pjesën më të madhe të ditës në shtrat. Në fund të fundit, organizmi po lufton infeksionin dhe ka nevojë për më shumë energji për t’u rikuperuar.

Sipas Dr. Chris Allen, specialist i gjumit dhe neurolog pediatër në Quality Sleep and Neurology në Michigan, gjumi është një nga mekanizmat më të fuqishëm që ka organizmi për të mbështetur sistemin imunitar.

“Gjumi me cilësi të lartë forcon përgjigjen imunitare dhe ndihmon organizmin të rikuperohet më shpejt kur jeni të sëmurë,” shpjegon ai.

Gjatë gjumit, sistemi imunitar prodhon më shumë citokina – proteina që ndihmojnë në luftimin e infeksioneve dhe inflamacionit – si edhe rrit prodhimin e qelizave T dhe antitrupave që mbrojnë organizmin nga mikrobet.

Megjithatë, sipas Dr. Allen, ekziston ajo që quhet “paradoksi i pushimit”, që nënkupton se edhe pushimi i tepërt mund të pengojë procesin e shërimit.

Qëndrimi në shtrat për orë të tëra ose fjetja për periudha shumë të gjata mund të çrregullojë ritmin cirkadian, orën biologjike që rregullon ciklin e gjumit dhe zgjimit. Si pasojë, mund ta keni më të vështirë të flini natën dhe të ndiheni të përgjumur gjatë ditës.

Ndërkohë, Dr. Yoshua Quinones, internist në Medical Offices of Manhattan, thekson se mungesa e lëvizjes për një kohë të gjatë mund të dobësojë muskujt, të shkaktojë ngurtësi në nyje, të rrisë lodhjen dhe madje të përkeqësojë dhimbjet trupore.

Ai shton se qëndrimi i zgjatur në shtrat mund të ndikojë edhe në humor, duke rritur rrezikun për ankth, mjegullim të mendimit dhe ulje të motivimit, gjë që mund ta ngadalësojë rikuperimin.

Sipas Dr. Allen, kjo është veçanërisht e rëndësishme te personat me infeksione të rrugëve të frymëmarrjes, pasi qëndrimi vazhdimisht shtrirë mund të kufizojë zgjerimin normal të mushkërive dhe të rrisë rrezikun e komplikimeve.

Ekspertët rekomandojnë që, edhe kur jeni të sëmurë, të synoni rreth shtatë deri në nëntë orë gjumë gjatë natës. Nëse ndiheni të lodhur gjatë ditës, një dremitje prej 20 deri në 30 minutash mund të jetë e dobishme, por nuk këshillohet të flini për periudha të gjata.

Një tjetër këshillë është të praktikoni atë që quhet “pushim aktiv”. Dr. Regina DePietro, mjeke e mjekësisë familjare në University of Missouri Health Care, shpjegon se lëvizjet e lehta ndihmojnë në ruajtjen e funksionit të zemrës dhe muskujve, mbështesin ritmin normal gjumë-zgjim dhe zvogëlojnë dobësinë që mund të shfaqet gjatë sëmundjes.

Nëse simptomat janë të lehta dhe nuk keni temperaturë apo kollë të fortë, një shëtitje e shkurtër në shtëpi ose disa ushtrime të lehta shtrirjeje mund të jenë të dobishme.

Po aq i rëndësishëm është edhe shëndeti mendor. Dr. Stacy Shaw, profesoreshë e psikologjisë dhe shkencave njohëse në Worcester Polytechnic Institute, thotë se kalimi i orëve të tëra duke lundruar në telefon ose duke parë lajme nuk ndihmon domosdoshmërisht në uljen e stresit.

Në vend të kësaj, ajo rekomandon aktivitete që sjellin kënaqësi, si leximi, dëgjimi i muzikës, një lojë e lehtë, një aktivitet krijues ose një shëtitje e shkurtër, nëse gjendja shëndetësore e lejon.

Ekspertët këshillojnë gjithashtu të ngriheni nga shtrati disa herë gjatë ditës, të hani vaktet ulur në tavolinë dhe të ekspozoheni ndaj dritës natyrale për rreth 15 minuta çdo mëngjes. Sipas Dr. Allen, kjo ndihmon në ruajtjen e ritmit biologjik dhe përmirëson cilësinë e gjumit.

Mbi të gjitha, dëgjoni sinjalet që ju jep trupi. Pushoni kur ndiheni të lodhur, por përpiquni të lëvizni pak kur keni energji. Nëse simptomat përkeqësohen, ndaloni aktivitetin dhe pushoni.

Nëse lodhja është e skajshme, flini më shumë se 10 orë në ditë për disa ditë radhazi ose simptomat nuk përmirësohen brenda shtatë deri në 10 ditësh, specialistët rekomandojnë të konsultoheni me mjekun. Sipas Dr. Allen, përgjumja e tepërt mund të jetë shenjë e një problemi tjetër shëndetësor, efekteve anësore të barnave ose një çrregullimi të gjumit që kërkon vlerësim dhe trajtim.