Studiuesit kanë konfirmuar se ilaçi oral për diabet, metformina, është po aq i sigurt për gratë shtatzëna dhe fëmijët e tyre, sa insulina, sipas një studimi të ri që gjurmoi 10,117 çifte fëmijë-nëna deri në 11 vite pas lindjes.

Metformina dhe insulina mund të përdoren edhe së bashku për të ndihmuar gratë me diabet të tipit 2 ose diabet gestacional të menaxhojnë nivelet e glukozës gjatë shtatzënisë, shkruan Medical News Today.

Ky hulumtim, i paraqitur në takimin vjetor ENDO 24 të Shoqatës Endokrine, vlerësoi efektet afatgjata të metforminës, duke përfshirë sigurinë e fëmijëve dhe nënave deri 11 vjet pas lindjes.

Metformina përdoret për më shumë se 60 vjet globalisht, duke përfshirë gratë shtatzëna, dhe konsiderohet më e thjeshtë se insulina, e cila kërkon injeksione të shumta ditore, monitorim të karbohidrateve dhe rregullime të shpeshta, si dhe mund të shkaktojë shtim në peshë. Metformina, si pilulë që merret dy deri tre herë në ditë, ka më pak efekt të tillë dhe nuk shkakton hipoglicemi.

Ndërsa studime të mëparshme gjurmuan vetëm shëndetin e fëmijëve deri në pesë vjet pas lindjes, ky studim ofron të dhëna më të gjata mbi sigurinë e ilaçit.

Ndërkohë që barnat moderne GLP-1, si Ozempic, nuk janë miratuar për përdorim gjatë shtatzënisë, metformina dhe insulina mbeten opsionet kryesore të sigurt për menaxhimin e diabetit në këtë periudhë të ndjeshme.

Rezultatet theksojnë se metformina është një alternativë e thjeshtë, e efektshme dhe e sigurt për nënat dhe fëmijët e tyre.