Kujdesi për shëndetin nuk varet vetëm nga mënyra si e kaloni kohën, por edhe nga vendi ku e kaloni atë, sidomos nëse është në natyrë.
Edhe pse fuqitë shëruese të natyrës nuk kuptohen ende plotësisht, një gjë është e qartë: kalimi i kohës në një mjedis natyror ndikon pozitivisht si në mendje, ashtu edhe në trup.
Ja si ndikon natyra në shëndetin tuaj:
Përfitimet shëndetësore të të qenit jashtë
Sipas Shoqatës Amerikane të Psikologjisë (APA), kalimi i të paktën dy orëve në javë në natyrë ka përfitime për shëndetin fizik dhe mendor. Qoftë në një dalje të vetme dy-orëshe apo në disa të shkurtra gjatë javës, përfitimet janë të dukshme.
Kalimi i kohës në natyrë mund të ndikojë pozitivisht në disa mënyra:
1. Forcon sistemin imunitar
Qëndrimi në natyrë ndihmon sistemin imunitar në disa drejtime. Kur jeni jashtë, trupi merr vitaminë D, e cila është e rëndësishme për imunitetin dhe shëndetin e kockave. Nivelet e ulëta të vitaminës D lidhen me rrezik më të lartë për infeksione virale.
Qëndrimi në pyll i njohur si “banjë pylli” është veçanërisht i dobishëm. Ajri i pyllit përmban fitoncide, substanca natyrore që lëshohen nga bimët dhe që kanë veti antibakteriale e antifungale. Këto nxisin trupin të prodhojë më shumë qeliza të bardha që luftojnë viruset dhe qelizat tumorale.
2. Përmirëson funksionet njohëse
Ekspozimi ndaj hapësirave të gjelbra përmirëson aftësitë njohëse si në afat të shkurtër, ashtu edhe në afat të gjatë por duhet të jetë një mjedis i qetë dhe natyror. Ambientet urbane kërkojnë përqendrim të vazhdueshëm, gjë që mund të lodhë trurin.
Qëndrimi në natyrë gjithashtu nxit kreativitetin. Studimet tregojnë se natyra zgjon kureshtjen dhe ndihmon rikthimin e përqendrimit, elemente thelbësore për mendimin krijues.
3. Përmirëson shëndetin e zemrës
Koha në natyrë ndihmon zemrën duke nxitur lëvizjen dhe duke ulur stresin. Përveç kësaj, natyra ndikon drejtpërdrejt në funksionet e zemrës, duke ulur ritmin kardiak dhe tensionin e gjakut.
Studime të shumta tregojnë se koha e kaluar në mjedise natyrore ul ndjeshëm tensionin arterial, pavarësisht nëse një person vuan apo jo nga hipertensioni.
4. Nxit gjumin cilësor
Ekspozimi ditor ndaj dritës natyrale, veçanërisht në mëngjes, ndihmon në rregullimin e ritmit cirkadian, që është cikli 24-orësh i trupit. Kur ora e brendshme përputhet me ciklin ditor të dritës dhe errësirës, përmirësohet cilësia e gjumit dhe vigjilenca gjatë ditës.
5. Ulë stresin
Studimet tregojnë se qëndrimi në hapësira të gjelbra ose mjedise natyrore ul ndjeshëm stresin psikologjik. Vetëm 20 minuta në një ambient që kujton natyrën ulin nivelin e kortizolit, hormonit të stresit.
Qëndrimi për 20–30 minuta në natyrë sjell efektin më të madh relaksues, pas së cilës nivelet e kortizolit stabilizohen.
6. Nxit aktivitetin fizik
Ushtrimet në natyrë ofrojnë një përvojë ndryshe nga ato në ambiente të mbyllura. Përvoja më e këndshme rrit motivimin për t’u ushtruar rregullisht. Si përfitim shtesë, njerëzit priren të ushtrohen më gjatë dhe me intensitet më të lartë kur janë në natyrë.
7. Përkrah shëndetin mendor
Qëndrimi në natyrë përmirëson humorin dhe redukton simptomat e ankthit dhe depresionit, duke ndikuar në aktivitetin e korteksit prefrontal, pjesa e trurit që rregullon emocionet.
Hapësirat e gjelbra mund të kenë efekt mbrojtës ndaj depresionit. Studiuesit kanë gjetur se personat që kalojnë pesë ose më shumë orë jashtë gjatë fundjavës kanë më pak rrezik për depresion të lehtë sesa ata që kalojnë më pak se 30 minuta në natyrë.
