Gratë janë më të ekspozuara ndaj problemeve të shëndetit mendor në javët e para pas lindjes, sipas një analize të re të publikuar në Molecular Psychiatry.

Studimi, që përfshiu të dhënat e rreth 1.8 milion lindjeve në Suedi (2003–2019), tregon se rreziku për depresion është rreth 20% më i lartë në javët 5 deri në 15 pas lindjes krahasuar me periudhën para shtatzënisë.

Ndërsa rreziku për psikoza është gjashtë deri në shtatë herë më i lartë në pesë javët e para pas lindjes dhe mbetet dyfish më i lartë deri në javën e 20-të, shkruan Euronews.

Ekspertët theksojnë se, ndryshe nga “baby blues” – ndryshimet e lehta dhe kalimtare të humorit – psikoza pas lindjes është një gjendje e rëndë që shoqërohet me deluzione, halucinacione, mani dhe konfuzion, por që trajtohet me sukses nëse kapet në kohë.

Të dhënat tregojnë gjithashtu se gjatë shtatzënisë numri i diagnozave për ankth, stres apo abuzim me substanca është më i ulët, ndoshta si rezultat i ndryshimeve biologjike dhe vizitave më të shpeshta mjekësore që ofrojnë mundësi për zbulim të hershëm.

Sipas Organizatës Botërore të Shëndetësisë, rreth 10% e grave shtatzëna dhe 13% e grave pas lindjes preken nga çrregullime mendore, kryesisht depresioni. 

Megjithatë, një studim tjetër nga Karolinska Institutet sugjeron se nënat në Suedi janë më pak të prirura të tentojnë vetëvrasje gjatë ose pas shtatzënisë krahasuar me burrat.

Studiuesit theksojnë rëndësinë e monitorimit të shëndetit mendor gjatë dhe pas shtatzënisë, duke theksuar se ndërhyrja e hershme mund të parandalojë pasoja të rënda.