Vezët janë një burim i shkëlqyer proteinash, me rreth 5.5 gramë proteina për një vezë mesatare, por nuk janë alternativa e vetme. Ka shumë ushqime të tjera, si kosi grek, edamame, mishi i pulës, arrat dhe të tjera, që përmbajnë edhe më shumë proteina se një vezë.
- Kosi grek
Kosi grek, i njohur për teksturën kremoze dhe shijen lehtësisht të athët, përgatitet ndryshe nga kosi tradicional. Ai kullohet disa herë për të larguar lëngun e tepërt, duke rezultuar me më shumë proteina për sasi sesa kosi i zakonshëm.
- Gjoksi i pulës
Përveçse është i pasur me proteina, mishi i gjoksit të pulës pa lëkurë ka pak yndyrë, sodium, karbohidrate dhe kalori. Gjoksi i pulës dhe burime të tjera të proteinave shtazore përmbajnë të nëntë aminoacidet esenciale, që janë blloqet ndërtuese të proteinës dhe që organizmi nuk mund t’i prodhojë vetë. Kjo i bën ato proteina të plota.
- Tuna
Përveç përmbajtjes së lartë të proteinave që ndihmojnë në ndërtimin e muskujve, tuna e konservuar është e pasur edhe me acide yndyrore omega-3, të cilat mbështesin shëndetin e zemrës dhe enëve të gjakut. Ajo ka afat të gjatë ruajtjeje dhe nuk ka nevojë për frigorifer derisa të hapet. Nëse konservohet në ujë dhe jo në vaj, tuna ka edhe pak kalori.
- Salmoni
Ashtu si tuna, salmoni i rritur në fermë është i pasur me acide yndyrore omega-3. Salmoni përmban gjithashtu shumë vitaminë D. Kjo vitaminë ndihmon organizmin të përthithë kalciumin dhe fosforin, të cilët janë të nevojshëm për ndërtimin e kockave të forta dhe mbrojtjen e nyjeve.
- Fasulet e zeza
Fasulet e zeza të konservuara në ujë janë një alternativë shumë e mirë vegane për të marrë proteinat që ju nevojiten. Ato janë gjithashtu të pasura me fibra të tretshme dhe të patretshme, të rëndësishme për shëndetin e tretjes dhe të sistemit kardiovaskular.
- Edamame
Edamame janë kokrra të reja soje. Ashtu si vezët dhe proteinat e tjera me origjinë shtazore, soja ofron proteina të plota. Edamame është gjithashtu një burim i mirë fibrash. Mund ta konsumoni si ushqim të lehtë ose ta shtoni në sallata apo tasa mëngjesi.
- Tofu
Tofu përgatitet nga soja. Ky ushqim me bazë bimore, që ka relativisht pak kalori, përmban vitamina dhe minerale të rëndësishme si bakri, seleniumi, mangani dhe kalciumi. Tofu mund të skuqet lehtë, të piqet në skarë ose në furrë. Një përzierje tofu mund të përdoret si zëvendësues i vezëve të fërguara.
- Gjalpi i kikirikut
Përveç përdorimit në sanduiçin klasik me gjalpë kikiriku dhe reçel, gjalpi i kikirikut mund të shtohet në salca, të përdoret si dressing për sallata, të përfshihet në supa ose të konsumohet si snack.
- Bajamet
Bajamet përmbajnë yndyra të shëndetshme mono të pangopura, të cilat mund të rrisin kolesterolin “e mirë” HDL dhe të ndihmojnë në uljen e yndyrave të dëmshme. Ato janë gjithashtu të pasura me kalcium, fibra, magnez, fosfor dhe vitaminë E.
- Thjerrëzat
Përveç proteinave, thjerrëzat janë të pasura me fibra dhe kanë pak kalori. Mund t’i konsumoni në supa, si garniturë ose në tasa mëngjesi.
- Mishi i viçit ose i derrit
Përveçse është i pasur me proteina, mishi i kuq përmban shumë vitamina të grupit B, hekur dhe zink. Veçanërisht, ai ju ndihmon të merrni vitaminën B12, e nevojshme për prodhimin e qelizave të kuqe të gjakut dhe formimin e nervave.
Ndërkohë, filetoja e derrit përmban 21.1 gramë proteina për 100 gramë produkt.
