Në Qendra Korrektuese për të Mitur Lipjan janë certifikuar 11 të mitur të dënuar, të cilët kanë përfunduar me sukses kursin bazik të ndihmës së parë.

Siç njofton, Shërbimi Korrektues i Kosovës, ky trajnim ka për qëllim pajisjen e pjesëmarrësve me njohuri dhe aftësi praktike për reagim të shpejtë dhe të saktë në situata emergjente, veçanërisht në rastet e arrestimit kardiak.

“Gjatë kursit, të miturit janë trajnuar në aplikimin e CPR dhe përdorimin e pajisjes AED, ndërhyrje këto që rrisin ndjeshëm shanset për mbijetesë, parandalojnë dëmtimet serioze të trurit dhe stabilizojnë gjendjen e personit deri në mbërritjen e ndihmës profesionale.” – ka njoftuar Shërbimi Korrektues i Kosovës.

Tutje në njoftim është theksuar se përveç aspektit praktik, ky trajnim kontribuon edhe në rritjen e vetëdijes dhe përgjegjësisë personale, duke e bërë ndihmën e parë një aftësi të rëndësishme për jetën e përditshme dhe për sigurinë në komunitet.