Shoqata e Onkologëve të Kosovës ka shprehur shqetësimi lidhur me situatën aktuale të shërbimeve onkologjike në Kosovë, duke thënë se vendi gjendet në një kohë kur numri i pacientëve me sëmundje malinje vazhdon të rritet nga viti në vit.

Në reagimin e shoqatës është thënë se pavarësisht nevojës së madhe për shërbime onkologjike dhe ngarkesës së vazhdueshme në sistemin shëndetësor publik, disa specialistë të rinj të onkologjisë, të trajnuar për vite me radhë me investim të konsiderueshëm publik dhe personal, vazhdojnë të mbeten pa mundësi punësimi në institucionet publike.

“Shoqata e Onkologëve të Kosovës vlerëson se çdo specialist i papunësuar përfaqëson një mundësi të humbur për diagnostikim më të shpejtë, trajtim më të personalizuar dhe përmirësim të përgjithshëm të kujdesit për pacientët me sëmundje malinje në Kosovë.” – thuhet në reagim.

Sipas kësaj shoqate, aktualisht, aplikimi i kimioterapisë dhe radioterapisë në nivel vendi realizohet kryesisht në Qendrën Klinike Universitare të Kosovës (QKUK), gjë që krijon ngarkesë të madhe për sistemin dhe shpeshherë rezulton me vonesa në trajtimin e pacientëve.Për këtë, Shoqata e Onkologëve të Kosovës ka theksuar se angazhimi sa më i shpejtë i onkologëve të rinj do të kontribuonte drejtpërdrejt në rritjen e kapaciteteve të shërbimeve onkologjike, përmirësimin e qasjes së pacientëve në trajtim dhe në uljen e kohës së pritjes për terapi.

Kjo shoqatë po ashtu u ka bërë thirrje institucioneve përgjegjëse që të adresojnë me prioritet këtë çështje, duke krijuar mundësi për integrimin e specialistëve të rinj në sistemin shëndetësor publik dhe duke forcuar kapacitetet e shërbimeve onkologjike në vend.

“Përmirësimi i trajtimit të pacientëve me kancer duhet të mbetet prioritet i përbashkët institucional dhe profesional.” -thuhet në reagim.