Të gjitha marrëdhëniet e ngushta kanë uljet dhe ngritjet e tyre. Ka shumë presione në jetën dhe kohën tonë, që nga familja tek financat, nga fëmijët tek komunikimi dhe për këtë arsye shumë çifte përballen me vështirësi në periudha të caktuara, shpjegon Shoqata Britanike për Këshillim dhe Psikoterapi.

Çfarë është këshillimi për çiftet apo për marrëdhënien?

“Ndjenja e sigurisë, lumturisë dhe lidhjes në marrëdhënien në çift është thelbësore për mirëqenien tonë emocionale,” thotë Arabella Russell.

“Kur çiftet vijnë në këshillim, këto ndjenja shpesh janë zëvendësuar me dhimbje, konflikte dhe ndjesinë e izolimit. Terapia në çift ofron një hapësirë të sigurt dhe mbështetëse për të reflektuar dhe eksploruar arsyet që kanë sjellë këtë shkëputje emocionale.

Qëllimi nuk është të fajësohet njëri-tjetri, por të ndihmohet secili që të lidhet sërish emocionalisht me partnerin. Të mësojë të dëgjojë ndryshe, të komunikojë më mirë dhe, nëse është e përshtatshme, të ndërtojë një marrëdhënie më të shëndetshme dhe më të lumtur në të ardhmen.”

Për kë është terapia në çift?

Vasia Toxavidi shpjegon se kjo terapi është për ata që duan të bëjnë një ndryshim në marrëdhënien e tyre dhe brenda vetes.

“Ajo u ofron çifteve ose individëve hapësirë për të eksploruar ndjenjat e tyre dhe për të reflektuar mbi marrëdhënien dhe mënyrat se si ndërveprojnë me njëri-tjetrin. Mund të ndihmojë në përpunimin e traumave apo humbjeve nga marrëdhëniet e mëparshme dhe të ndihmojë në kuptimin e sjelljes në lidhje intime.”

“Ajo është për të gjitha çiftet, të çdo moshe dhe në çdo fazë të marrëdhënies, jo vetëm për ata që janë në krizë,” shton Arabella. “Ne i bëjmë servisin makinës rregullisht, pse të mos i japim edhe marrëdhënies një kontroll të rregullt?”

Çfarë problemesh mund të ndihmojë këshillimi për çiftet?

Çiftet paraqesin një gamë të gjerë shqetësimesh në terapi, që nga mungesa e intimitetit dhe prishja e komunikimit, tek problemet me besimin, xhelozinë dhe tradhtinë. Konfliktet familjare dhe kalimi i periudhave të vështira në jetë mund të ndikojnë në marrëdhënie, ashtu si edhe stresi nga puna apo vështirësitë financiare.

Vasia thotë se disa çifte janë ndikuar nga intensiteti i izolimeve gjatë pandemisë COVID-19.

“Punët nga shtëpia ose mungesa e kontakteve me miqtë dhe familjen kanë ndikuar në ndjenjën e individualitetit, dhe kjo ka qenë e vështirë për disa çifte. Kjo i ka detyruar njerëzit të përballen me realitetin e tyre dhe të pyesin veten se sa të kënaqur janë në marrëdhënien që kanë.”

Si funksionon terapia për çiftet?

Këshillimi ofron një hapësirë të sigurt dhe mbështetëse për të eksploruar vështirësitë dhe për të ndihmuar në gjetjen e një rruge përpara.

Mënyra se si sillemi në marrëdhëniet në moshë madhore mund të ketë rrënjë në përvojat tona të mëparshme. Një pjesë e rëndësishme e terapisë për çiftet është të zbulohet ndikimi i të kaluarës në secilin individ dhe të ndihmohet për ta ndarë atë nga e tashmja.

“Nuk e kuptojmë që po e bëjmë këtë, por thjesht ndiejmë një zemërim apo trishtim të madh kur partneri ynë nuk na dëgjon ose nuk e merr seriozisht atë që themi,” thotë Arabella.

“Një vështrim në të kaluarën mund të zbulojë se ndjenja e të qenit i padëgjuar apo i parëndësishëm është një model i njohur nga fëmijëria. Kjo lidhje nuk e justifikon sjelljen e partnerit, por e bën reagimin tonë më të kuptueshëm.”

Vasia shpjegon se terapia mund të ndihmojë në identifikimin dhe përballimin e sjelljeve dhe mënyrave negative të komunikimit.

“Një terapist mund t’ju ndihmojë të mësoni të komunikoni ndryshe dhe ta shihni njëri-tjetrin me një këndvështrim të ri. Mund t’ju ofrojmë mjete për të shprehur më mirë ndjenjat dhe nevojat, për të vendosur kufij dhe për të ndërtuar një marrëdhënie më të shëndetshme.”

Çfarë nuk mund të bëjë terapia në çift

Megjithatë, terapia nuk është një zgjidhje magjike që rregullon menjëherë një marrëdhënie.

“Shpesh njerëzit hyjnë në terapi duke shpresuar se do të rregullojë marrëdhënien, do të rikthejë pasionin ose do ta ndryshojë partnerin,” thotë Vasia.

“Këshillimi mund t’ju ndihmojë të kuptoni më mirë veten dhe tjetrin, dhe të ofrojë udhëzime e mjete, por nuk mund të ndryshojë një person apo një marrëdhënie nëse nuk ka përkushtim dhe gatishmëri për të punuar nga të dyja palët.”

Arabella shton: “Qëllimi i terapisë në çift është të ndihmojë në krijimin e një marrëdhënieje të shëndetshme, të lumtur dhe të sigurt, nëse të dy individët e dëshirojnë këtë. Terapisti mund t’ju udhëzojë dhe ndihmojë, por është çifti ai që duhet të bëjë punën e vështirë.”

Për disa çifte, ndarja mund të jetë opsioni më i shëndetshëm dhe më i sigurt. Në këtë rast, këshillimi për çiftet mund të ndihmojë në përballimin e këtij procesi.

“Nuk do të largojë dhimbjen apo pikëllimin që sjell përfundimi i një marrëdhënieje, por mund të ofrojë një hapësirë për të reflektuar mbi arsyet pse nuk funksionoi dhe për të menduar për mënyrën më konstruktive për të ecur përpara,” thotë Arabella. “Kjo është veçanërisht e rëndësishme kur ka fëmijë në mes.”

Bashkëpunimi me një terapist për çiftet

Kathleen Daymond nga shërbimi për mbështetje psikologjike thotë se është shumë e rëndësishme të gjeni një terapist me përvojë dhe trajnim specifik për punën me çifte.

“Punimi me një çift është shumë ndryshe nga puna me një individ,” thotë ajo. “Terapisti duhet të jetë në gjendje të punojë me secilin si individ dhe me marrëdhënien mes tyre. Të dy duhet të ndiheni rehat me terapistin tuaj, ndaj mos hezitoni të flisni me dy ose tre para se të vendosni dhe bëni pyetje të hapura.”

Kontraktimi dhe konfidencialiteti janë veçanërisht të rëndësishëm në terapinë në çift.

“Duhet të bini dakord se çfarë ndodh nëse terapisti dëshiron të zhvillojë sesione individuale me secilin prej jush,” thotë Kathleen. “Kjo mund të jetë e dobishme për të eksploruar një çështje brenda marrëdhënies ose një problem personal, si humbje apo stres në punë, që ndikon në çiftin. A do të qëndrojë ajo që flisni mes jush dhe terapistit, apo mund të përmendet në sesionet e përbashkëta?

Shpesh këtu ndodhin keqkuptime, nëse njëri partner ndjen se është thyer besimi apo se po flitet pas shpine.”

Duhet gjithashtu të diskutoni për mënyrën se si ruhen të dhënat tuaja. Për shembull, njëri partner nuk mund të ketë qasje në shënimet e përbashkëta ose t’i ndajë ato me një mjek pa miratimin e tjetrit.

Nëse ndonjëri prej jush ka shqetësime për atë që po ndodh gjatë terapisë, flisni menjëherë me terapistin. “Terapisti duhet të qëndrojë i paanshëm, të mos japë këshilla, të mos marrë anë dhe të mos orientojë asnjërin,” thotë Kathleen. “Roli i tij është t’ju ndihmojë të shihni më qartë marrëdhënien dhe të gjeni rrugën më të mirë për të ecur përpara.” /British Association for Counselling and Psychotherapy/