Një studim i kryer mbi verën përvëluese të vitit 2022 në Evropë tregon se më shumë se gjysma e vdekjeve të lidhura me nxehtësinë nuk do të kishin ndodhur nëse nuk do të ishte për ndryshimet klimatike të shkaktuara nga njeriu.

“Pa veprime të forta, temperaturat rekord dhe vdekjet nga nxehtësia do të vazhdojnë të rriten në vitet e ardhshme”, theksoi Joan Ballester Claramunt, profesor kërkues në Institutin për Shëndetin Global në Barcelonë.

Sipas të dhënave, mbi 68 mijë persona humbën jetën nga nxehtësia në Evropë gjatë verës 2022.

Studimi zbuloi se 56% e këtyre vdekjeve ishin shkaktuar nga temperaturat ekstreme të ndikuara nga ngrohja globale. Shifra përbën mbi 38 mijë vdekje të tepërta në 32 vende evropiane.

Temperatura e lartë rezultoi më vdekjeprurëse për gratë dhe për të moshuarit mbi 80 vjeç.

Gjetjet e studimit, të publikuara në revistën npj Climate and Atmospheric Science, theksojnë ndikimin e madh të ngrohjes globale mbi shëndetin publik.