Mbajtja e të vegjëlve të zënë mund të jetë një punë me kohë të plotë, ndaj është gjithmonë e dobishme të keni disa ide në dorë për aktivitete argëtuese që mund t’i bëni së bashku. UNICEF shpjegon se mënyra më e mirë që fëmijët të mësojnë, pavarësisht aftësive të tyre, është përmes lojës. Loja ka të bëjë me zbulimin dhe argëtimin. Këtu janë 10 aktivitete stimuluese që mund t’i bëni brenda shtëpisë me fëmijën tuaj. “Bëhuni të duruar, dëgjoni dhe shijoni kohën dhe mësimin së bashku” thotë UNICEF.

1. Luani me lodra

Vendosni një shumëllojshmëri lodrash në një tabaka ose sipërfaqe të sheshtë për të stimuluar fëmijën tuaj. Provoni lodra ndijore ose lodra me kapëse thithëse që ngjiten në sipërfaqe të sheshta. Mund të përdorni gjithashtu sfungjerë ose gota.

2. Krijoni një lojë me top

Ju madje mund të bëni vetë një top duke përdorur copa pëlhure. Vendosni mënyrën më të mirë për të luajtur me duar ose këmbë, në varësi të lëvizshmërisë së fëmijës suaj.

3. Bëni një video

Xhironi një video të fëmijës suaj dhe tregojani atë. Ju gjithashtu mund ta bëni këtë vetëm me regjistrues audio për t’ia dëgjuar këngën ose të qeshurat.

4. Argëtohuni në kuzhinë

Merrni fëmijët në kuzhinë për t’ju ndihmuar gjatë përgatitjes së ushqimit. Në varësi të asaj që po bëni dhe sa i interesuar është fëmija juaj, mund ta lini të ndihmojë ose thjesht t’i jepni një tas plastik dhe një lugë për të imituar veprimet tuaja.

5. Bëni art së bashku

Shfrytëzoni talentin e tyre artistik dhe lërini të ngjyrosin ose të pikturojnë. Ka furça dhe mjete vizatimi me forma të mëdha, të lehta për t’u mbajtur, që fëmijët me lëvizshmëri të kufizuar mund t’i përdorin më lehtë. Piktura me gishta është gjithashtu një mundësi argëtuese.

6. Koha e tregimit

Lexoni libra së bashku në një pozicion të rehatshëm, ulur ose në këmbë (në varësi të aftësisë së fëmijës suaj). Ju gjithashtu mund të shikoni albume fotografish familjare dhe t’u tregoni fytyra të njohura. Gjetja e pozicionit më të mirë, që mund të ndihmohet me një jastëk ose me një tabaka të pjerrët në tavolinë, do ta bëjë fëmijën tuaj të ndihet më rehat dhe do ta inkurajojë të mbajë kokën lart.

7. Shijoni lojën e shqisave

Përgatitni një tabaka me ujë ose rërë për fëmijën tuaj që të luajë me tekstura të ndryshme. Mund të shtoni edhe lodra për më shumë argëtim.

8. Luani me brumë ose argjilë

Mund të përdorni argjilë ose brumë të bërë në shtëpi. Përdorni forma dhe kënaquni duke prerë e bashkuar forma të ndryshme. Pritëset për biskota ose gotat e mëdha me doreza të mëdha mund të jenë më të lehta për t’u kapur nga fëmija juaj.

9. Koha e qetësisë

Kaloni pak kohë të qetë duke luajtur me pazëlla të thjeshta ose duke bërë karta me forma, ngjyra, fjalë ose numra. Përdorimi i një sipërfaqeje të sheshtë dhe të lëmuar, si tavolinë ose tabaka, do ta bëjë aktivitetin më të lehtë.

10. Krijoni një bandë muzikore

Këndoni, vallëzoni dhe bëni zhurmë me fëmijën tuaj. I vogli juaj mund të përdorë çdo tenxhere kuzhine dhe instrumente të bëra në shtëpi për të mbajtur ritmin me ju.