Fruthi po përhapet me shpejtësi në SHBA, me më shumë se 700 raste të konfirmuara deri të premten. 

Texas është më i godituri, me 541 raste, duke përfshirë edhe dy fëmijë të pavaksinuar që kanë humbur jetën. Një viktimë tjetër ishte një i rritur në New Mexico, gjithashtu i pavaksinuar.

Shtetet me shpërthime aktive (3+ raste):

Texas: 355 raste vetëm në Gaines County, ku jeton një komunitet i ngushtë Mennonite me norma të ulëta vaksinimi.

New Mexico: 58 raste, shumica të lidhura me shpërthimin në Texas përmes testimit gjenetik.

Kansas: 32 raste në 8 qarqe – rasti i parë i lidhur me shpërthimet në Texas dhe New Mexico.

Oklahoma: 12 raste gjithsej.

Ohio: 20 raste, përfshirë një shpërthim me 14 persona në Knox County, por disa nuk janë banorë të shtetit.

Indiana: 6 raste në Allen County, të gjitha të lidhura me njëri-tjetrin.

Si përhapet fruthi dhe pse është shqetësues?

Është një virus shumë ngjitës, që përhapet në ajër përmes kollitjes, teshtimës apo frymëmarrjes.

Shkakton temperaturë të lartë, kollë, rrufë, skuqje të syve dhe një skuqje karakteristike të lëkurës.

Mund të çojë në komplikime të rënda: pneumoni, verbim, ënjtje të trurit dhe madje edhe vdekje.

Çfarë roli kanë vaksinat?

Fruthi është plotësisht i parandalueshëm me vaksinën MMR (fruthi, shytat dhe rubeola).

Vaksina rekomandohet në dy doza: e para në moshën 12–15 muajsh dhe e dyta në 4–6 vjeç.

Imuniteti i grupit (herd immunity) arrihet kur më shumë se 95% e popullatës është e vaksinuar, gjë që ndalon përhapjen e virusit.

Që nga pandemia, normat e vaksinimit kanë rënë dhe më shumë prindër po kërkojnë përjashtime për arsye personale ose fetare.

A duhet një dozë përforcuese?

Njerëzit në rrezik të lartë që janë vaksinuar vite më parë dhe jetojnë në zona me shpërthime mund të marrin një booster (dozë përforcuese).

Mjeku mund të rekomandojë analizë të gjakut për të matur antitrupat e fruthit, por kjo nuk është gjithmonë e nevojshme.