Uthulla e mollës mund të ulë sheqerin në gjak dhe të qetësojë refluksin acid, por mos e besoni të gjitha pretendimet që dëgjoni për të.

Uthulla e mollës përdoret si një produkt natyral për shëndetin prej mijëra vitesh. Në kohët e lashta, përdorej për trajtimin e kollës dhe infeksioneve. Sot, shumë e konsiderojnë si një ndihmë për humbjen e peshës, një kurë për refluks acid dhe një mënyrë për të kontrolluar sheqerin në gjak.

Por, a mund të bëjë vërtet të gjitha këto?

Ka arsye për dyshim dhe nevojitet më shumë kërkim për të mbështetur këto përfitime të mundshme të uthullës së mollës.

Çfarë është uthulla e mollës?

Uthulla e mollës është lëngu i mollës që ka kaluar dy herë procesin e fermentimit. Përbërësi i saj kryesor është acidi acetik, i cili formohet gjatë fermentimit dhe besohet se ka përfitime të ndryshme shëndetësore.

Ajo prodhohet duke shtypur mollët dhe përzier me maja, sheqer ose ndonjë karbohidrat tjetër. Pas disa javësh, bakteret dhe majat natyrale fermentojnë lëngun, duke e kthyer karbohidratin në alkool. Fermentimi i dytë ndryshon alkoolin në acid acetik.

Sipas dietologes Beth Czerwony, uthulla e mollës nuk ka shumë vitamina, minerale apo kalori, por përfitimet e saj shëndetësore gjenden në substanca që nuk tregohen në etiketën ushqimore standarde.

Çfarë përmban uthulla e mollës së papërpunuar?

• Acid acetik, që mund të vrasë bakteret e dëmshme — përmban rreth 5-6% acid acetik

• Probiotikë natyralë (baktere të mira), që përmirësojnë imunitetin dhe shëndetin e zorrëve

• Antioksidantë, substanca natyrale që parandalojnë dëmtimin e qelizave

Në dyqane shiten dy lloje: e pasterizuar dhe e papërpunuar. Për qëllime shëndetësore, shumica përdorin uthullën e papërpunuar, që është pak e turbullt. Në fund të shishes ndodhet një sedimente e njohur si “nëna”, e pasur me baktere dhe maja natyrale.

Përfitimet e mundshme të uthullës së mollës

A është uthulla e mollës e mirë për shëndetin? Disa studime tregojnë se mund të ketë përfitime, por sipas Czerwony, shumica e këtyre studimeve janë të vogla dhe kërkojnë më shumë kërkime.

Megjithatë, ja disa prej përfitimeve që ia vlen të përmenden:

Mund të ulë sheqerin në gjak

Një prej pretendimeve më të mëdha ka të bëjë me diabetin dhe kontrollin e sheqerit. Në diabetin tip 2, qelizat e trupit nuk e përthithin mirë sheqerin nga ushqimi.
Analizat tregojnë se uthulla e mollës mund të ulë nivelin e sheqerit në gjak kur merret me ushqime me karbohidrate komplekse, duke ngadalësuar kalimin e ushqimit nga stomaku në zorrën e hollë dhe thithjen e sheqerit.

Sidoqoftë, Czerwony paralajmëron se kjo ulje është e vogël dhe nuk zëvendëson një dietë të shëndetshme dhe ushtrime fizike. Nëse merrni medikamente për uljen e sheqerit, duhet të konsultoheni me mjekun para se të filloni përdorimin e uthullës.

Mund të ulë kolesterolin

Studimet tregojnë gjithashtu se uthulla mund të ulë kolesterolin total dhe trigliceridet (lloje yndyre në gjak), ndërsa rrit kolesterolin e mirë (HDL). Por, kërkime më të mëdha janë të nevojshme për të kuptuar rolin e saktë të saj.

Mund të qetësojë refluksin acid

Disa njerëz përdorin uthullën për refluksin acid, duke besuar se për shkak të probiotikëve, ajo ndihmon ekuilibrin e baktereve në stomak dhe kështu lehtëson simptomat.
Megjithatë, nuk ka prova shkencore të forta që e mbështesin këtë. Por nëse mjeku juaj e miraton përdorimin, nuk duket se shkakton dëm.

Mund të ndihmojë në humbjen e peshës

Disa thonë se uthulla i ka ndihmuar në humbje peshe, por shkenca nuk është e qartë në këtë drejtim.
Ajo mund të ndihmojë që të ndiheni më të ngopur për rreth dy orë pas ngrënies, duke ulur dëshirën për të ngrënë. Megjithatë, nuk ka prova që ajo ul ndjeshëm oreksin në afat të gjatë.

Mund të përmirësojë imunitetin

Uthulla e mollës ka shumë probiotikë dhe polifenole që ndihmojnë në neutralizimin e radikaleve të lira dhe përmirësojnë shëndetin e zorrëve, gjë që ndikon pozitivisht edhe në shëndetin e qelizave.

Mund të parandalojë dëmtimin e qelizave

Përmban antioksidantë që mbrojnë qelizat nga dëmtimet që shkaktojnë radikalet e lira.

Efektet anësore të uthullës së mollës

Uthulla e mollës është shumë acidike dhe mund të sjellë disa probleme:

• Aciditeti mund të dëmtojë smaltin e dhëmbëve, që është mbrojtësi i tyre natyral.
• Konsumimi i uthullës së papërzier mund të djegë ezofagun (gypin e ushqimit).
  Për ta parandaluar këtë, është mirë ta përzieni një lugë uthull me një gotë ujë të ngrohtë para përdorimit.

Efekte të tjera të mundshme:

• Ulje e nivelit të kaliumit në gjak, prandaj nuk duhet përdorur nga ata që kanë tashmë këtë problem.
• Mund të ndërveprojë me medikamente të ndryshme, përfshirë insulinën, diuretikët, laksativët dhe disa ilaçe për presionin e lartë.
• Nausea dhe të vjella; disa njerëz thjesht nuk i përballojnë shijen dhe aciditetin.
• Për njerëzit me probleme në tretje që ngadalësojnë kalimin e ushqimit në stomak (gastropareza), uthulla mund ta përkeqësojë këtë gjendje.

Gjithashtu, uthulla e pastër duhet të mbahet larg fëmijëve sepse mund të shkaktojë djegie në lëkurë ose gojë.

Si ta përdorni uthullën e mollës?

Nuk ka një dozë standarde, prandaj këshillohet të pyesni një mjek ose specialist për sasinë e duhur. Zakonisht, një sasi e vogël është e sigurt për shumicën e njerëzve.

Ju mund të filloni me disa pika uthull të përzier në ujë dhe gradualisht të rritni deri në dy lugë gjelle në ditë. Disa mënyra për ta përdorur:

• Shtoni një lugë uthull në një filxhan çaj të ngrohtë për të zbutur shijen.
• Përdorni uthullën në salca, dressing për sallatë ose marinata.
• Shërben për konservimin e ushqimeve, sepse acidi ndihmon në vrasjen e baktereve.

Gjithashtu, uthulla gjendet edhe në formë tabletash ose gummies, por FDA nuk i rregullon këto suplementë.

Çfarë kuptojmë nga e tërë kjo?

Në mungesë të provave të plota për të gjitha përfitimet, është e rëndësishme të konsultoheni me mjekun para se të përdorni uthullën e mollës ose ndonjë tjetër kurë natyrale.

“Uthulla e mollës nuk është një mrekulli dhe nuk zëvendëson një dietë të shëndetshme,” thekson Czerwony. “Ka disa studime premtuese, por nuk është një zgjidhje e shpejtë.” /Cleveland Clinic/