Shërbimi Spitalor Klinik dhe Universitar i Kosovës (SHSKUK) ka njoftuar se në Klinikën Obstetrike dhe Gjinekologjike (KOGj), të Qendrës Klinike dhe Universitare të Kosovës, për herë të parë janë kryer me sukses dy operacione të rralla dhe shumë të rëndësishme për pacientet.

Sipas njoftimit, operacionet janë realizuar tek dy paciente me anomali kongjenitale të organeve gjenitale, ku gjatë zhvillimit embrional nuk janë zhvilluar plotësisht disa pjesë të tyre (mitra dhe vagina).

“Ky sukses është rezultat i bashkëpunimit profesional ndërmjet stafit të klinikës dhe dr. Alban Nezirit, gjinekolog, i cili jeton dhe punon në Zvicër, i cili me përvojën dhe ekspertizën e tij dha një kontribut të jashtëzakonshëm për realizimin e këtyre ndërhyrjeve për herë të parë në vendin tonë.” ka shkrar SHSKUK në njoftimin e tyre, duke shtuar tutje se po ashtu, kontribut të çmuar ka dhënë ekipi i gjinekologëve nga klinika, e poashtu anesteziologëve dhe stafit nga Klinika e Anesteziologjisë.

Sips SHSKUK-së, ky është një hap i madh drejt përmirësimit të cilësisë së jetës së këtyre pacienteve dhe hap mundësinë që në faza të ardhshme, në qendra të specializuara evropiane, të kryhet edhe transplantimi i mitrës.

“QKUK , falënderon përzemërsisht Dr. Alban Nezirin për kontributin e tij të çmuar në këtë arritje të rëndësishme, si dhe të gjithë stafin e Klinikës së Obstetrikës dhe Gjinekologjisë dhe Klinikës së Anesteziologjisë për angazhimin, përkushtimin dhe profesionalizmin e treguar.” ka përmbyllur SHSKUK.