Nëse ndieni se po sëmureni, ndoshta po pyesni veten si mund ta ndaloni një grip që në hapat e parë. Edhe pse nuk mund ta parandaloni plotësisht, ka disa mënyra që mund ta lehtësojnë rrjedhën e sëmundjes. Pini ujë me limon dhe mjaltë, pushoni mjaftueshëm dhe qëndroni të ngrohtë e të tharë. Kur shfaqen simptomat e para, përdorimi i barnave dhe një dietë e pasur me ushqyes mund t’ju ndihmojë të ndiheni më mirë, më shpejt.

Sipas Qendrës për Kontrollin dhe Parandalimin e Sëmundjeve, një i rritur sëmuret mesatarisht dy deri në tre herë në vit, dhe gripi zgjat zakonisht rreth një javë. Simptomat janë më të forta gjatë ditëve të para, por mund të zgjasin deri në dy javë.

1. Shtoni mjaltë në ujë

Mjalti mund të zbusë kollën dhe të lehtësojë irritimin në rrugët e frymëmarrjes. Disa studime tregojnë se ai ka veti antimikrobike dhe ndihmon në uljen e inflamacionit.

Mund të konsumoni një deri në dy lugë mjaltë drejtpërdrejt ose ta përzieni me çaj apo ujë të ngrohtë. Mjalti është i përshtatshëm për të rriturit dhe fëmijët mbi një vjeç. Mos u jepni mjaltë foshnjave nën një vjeç, pasi mund të shkaktojë sëmundje të rrezikshme.

2. Pini shumë lëngje

Hidratimi është thelbësor për të zbutur dhimbjen e fytit dhe për të lehtësuar hundën e zënë. Pini ujë, çaj ose lëngje natyrale dhe shmangni pijet me kafeinë apo alkool. Nëse fytin e keni shumë të acaruar, provoni të thithni copa akulli.

3. Merruni me aktivitet të lehtë fizik

Një aktivitet i lehtë fizik mund të ndihmojë sistemin tuaj imunitar. Një shëtitje e qetë apo një seancë joge mund të jenë më të përshtatshme sesa një stërvitje intensive.

Nëse keni ethe, dhimbje trupi apo ndiheni shumë të lodhur, është më mirë të pushoni. Nëse vuani nga ndonjë sëmundje si astma, sëmundjet e zemrës apo të mushkërive, këshillohuni me mjekun para se të bëni ushtrime.

4. Ushqehuni me produkte të pasura me vlera ushqyese

Një dietë e balancuar dhe e pasur me proteina, drithëra integrale, fruta dhe perime mund të forcojë sistemin tuaj imunitar. Fokusohuni te mishi pa yndyrë, peshku, bishtajoret dhe perimet me ngjyra të forta, që janë të mbushura me antioksidantë.

5. Konsumoni supë të ngrohtë

Një pjatë me supë, veçanërisht ajo me mish pule dhe perime, është një nga zgjidhjet më të mira kur jeni të sëmurë. Jo vetëm që qetëson, por ka edhe përfitime të mundshme kundër inflamacionit.

Nëse nuk konsumoni mish, mund të përgatisni supë me perime ose thjerrëza, që gjithashtu ndihmojnë në forcimin e imunitetit.

6. Shpëlani fytin me ujë të kripur

Nëse ndieni djegie apo acarim në fyt, përgatitni një gotë me ujë të ngrohtë dhe shtoni gjysmë luge çaji kripë. Bëni gargarë dhe më pas pështyjeni. Kjo ndihmon në zbutjen e fytit.

Këtë mund ta bëni disa herë në ditë. Kjo metodë nuk rekomandohet për fëmijët e vegjël që nuk dinë të bëjnë gargarë pa e gëlltitur ujin.

7. Merrni një ditë pushimi

Nëse keni mundësi, qëndroni në shtëpi. Pushimi është thelbësor që trupi juaj të luftojë më lehtë virusin. Kjo gjithashtu ndihmon në parandalimin e përhapjes së sëmundjes te të tjerët.

Nëse duhet të shkoni në punë, përpiquni të qëndroni larg të tjerëve, lani duart rregullisht ose përdorni dezinfektues. Mund të vendosni edhe maskë, veçanërisht nëse dyshoni se simptomat tuaja mund të lidhen me COVID. Në këtë rast, bëni testin dhe shmangni kontaktin me persona të rrezikuar.

8. Përdorni barna pa recetë

Mund të përdorni qetësues si paracetamoli për të ulur temperaturën dhe për të lehtësuar dhimbjet e trupit. Medikamentet kundër alergjive si cetirizina ose difenhidramina mund të ndihmojnë për disa simptoma si lotimi i syve apo rrjedhja e hundës.

Disa barna përmbajnë edhe dekongestantë që ndihmojnë për të pastruar sinuset. Lexoni me kujdes udhëzimet dhe këshillohuni me farmacistin apo mjekun para përdorimit, sidomos për fëmijët.

Mos u jepni barna kundër kollës apo gripit fëmijëve nën 2 vjeç, dhe përdorni gjithmonë produkte të përshtatshme për moshën e tyre. Kini kujdes të mos kombinoni disa produkte që përmbajnë të njëjtën substancë aktive, për të shmangur mbidozën.

9. Provojeni spray-n për hundë

Spray-t me solucion të kripur mund të ndihmojnë në lagështimin e hundës dhe pastrimin e mukusit në fillimet e gripit. Lexoni me kujdes udhëzimet për përdorim në paketim.

Për më shumë efekt, mund të bëni një dush të ngrohtë, pasi avulli ndihmon në lirimin e rrugëve të frymëmarrjes.

Kur duhet të kërkoni ndihmë mjekësore

Kontaktoni mjekun nëse simptomat përkeqësohen pas disa ditësh, zgjasin më shumë se 10 ditë ose nëse shfaqen shenja të pazakonta. Kjo mund të tregojë se nuk bëhet fjalë për një grip të zakonshëm dhe mund të nevojiten trajtime të tjera.

Nëse jeni në grupin e personave me rrezik të lartë nga komplikimet dhe keni ethe, dridhje dhe dhimbje trupi, telefononi mjekun sa më parë. Mjeku mund të përcaktojë nëse keni grip apo diçka tjetër dhe t’ju rekomandojë trajtimin e duhur.

Personat me rrezik më të lartë për komplikime përfshijnë:

• Fëmijët nën 5 vjeç

• Të moshuarit mbi 65 vjeç

• Personat me sëmundje kronike si astma, diabeti apo sëmundje të zemrës

• Gratë shtatzëna

Një përmbledhje e shkurtër

Gripi zakonisht zgjat rreth një javë, por disa simptoma mund të vazhdojnë edhe më gjatë. Nëse ndieni se po sëmureni, disa metoda të thjeshta mund t’ju ndihmojnë të përmirësoheni më shpejt.

Pushoni, hidratohuni me lëngje të ngrohta si ujë me limon dhe mjaltë, dhe ushqehuni shëndetshëm. Nëse simptomat janë të lehta, pak aktivitet fizik mund të jetë i dobishëm. Për çdo shqetësim që zgjat më shumë se 10 ditë ose bëhet më serioz, kontaktoni mjekun. /Health/