Shkuarja me biçikletë për në punë mund të përmirësojë ndjeshëm shëndetin tuaj dhe të zvogëlojë rrezikun e vdekjes, tregon një studim i ri.

Njerëzit që udhëtojnë me biçikletë kanë një rrezik të përgjithshëm 47% më të ulët për një vdekje të hershme, zbuluan studiuesit.

Ata gjithashtu kanë më pak gjasa të zhvillojnë sëmundje të zemrës, kancer dhe probleme të shëndetit mendor, tregojnë rezultatet.

Ecja për në punë dha gjithashtu disa përfitime shëndetësore, por udhëtimi me biçikletë dha nxitjen më të fortë për mirëqenien e një personi, raportuan studiuesit në revistën BMJ Public Health, transmeton Klan Kosova.

“Ky studim ofron prova në kohë të përfitimeve shëndetësore të udhëtimit aktiv për politikëbërësit lokalë, kombëtarë dhe ndërkombëtarë”, përfundoi ekipi hulumtues i udhëhequr nga Catherine Friel, studiuese doktorature në Universitetin e Glasgow në Skoci.

Për këtë raport, studiuesit analizuan të dhënat nga një studim kombëtar shëndetësor në Skoci që përfshin 5% të popullsisë skoceze.

Si pjesë e studimit kombëtar, pjesëmarrësit u pyetën se si udhëtonin për në punë. Përgjigjet e tyre ishin të lidhura me të dhënat e pranimeve në spitale kombëtare, recetave të barnave dhe vdekjeve midis viteve 2001 dhe 2018.

Studiuesit zbuluan se udhëtimi me biçikletë shoqërohej me:

Rrezik 51% më të ulët për të vdekur nga kanceri

Rrezik 24% më të ulët për t’u shtruar në spital për kancer

Rrezik 24% më të ulët i shtrimit në spital për sëmundje të zemrës

Rrezik 30% më të ulët për t’iu përshkruar një ilaç për zemrën

Rrezik 20% më të ulët për të marrë një recetë për problemet e shëndetit mendor

Kishte një anë negative – udhëtarët me biçikletë kishin dy herë më shumë gjasa të pranoheshin në spital për ndonjë aksidenti trafiku, tregojnë rezultatet.

“Zbulimi ynë që udhëtarët me biçikletë kanë dy herë më shumë rrezik për të qenë një viktimë e trafikut rrugor krahasuar me udhëtarët joaktivë, përforcon nevojën për infrastrukturë më të sigurt çiklizmi”, theksuan studiuesit.