Një studim i ri tregon se trauma në fëmijëri rrit ndjeshëm rrezikun për zhvillimin e 20 sëmundjeve kryesore në moshë të rritur, veçanërisht për gratë.

Studimi, i udhëhequr nga UCLA Health dhe i financuar nga Instituti Kombëtar për Plakjen, u publikua në revistën Brain, Behavior, and Immunity, transmeton Klan Kosova.

Sipas studiuesve, njerëzit që kanë përjetuar stres të madh në fëmijëri kanë më shumë gjasa të vuajnë nga sëmundje zemre, kancer, çrregullime metabolike dhe probleme mendore.

Studimi vuri re se efektet e këtyre traumave janë më të forta te gratë, ndërsa burrat janë më të ndjeshëm ndaj abuzimeve emocionale dhe neglizhencës.

Ekspertët theksojnë rëndësinë e ndërhyrjeve të hershme dhe kujdesit mjekësor për të adresuar efektet afatgjata të stresit në shëndet.