Një test i vetëm gjaku që mat inflamacionin dhe yndyrën mund të parashikojë rrezikun e grave për sëmundje kardiovaskulare 30 vjet më vonë, sugjeron një studim i ri i Harvardit.

Gjetjet, të prezantuara të shtunën në Kongresin e Shoqatës Evropiane të Kardiologjisë 2024 në Londër, u botuan në New England Journal of Medicine, transmeton Klan Kosova.

Financuar nga Instituti Kombëtar i Shëndetësisë, studimi mund të nxisë zbulimin dhe trajtimin më të hershëm të çrregullimeve të zemrës dhe enëve të gjakut.

Testimi i dy llojeve të yndyrës në qarkullimin e gjakut së bashku me proteinën C-reaktive, një shënues i inflamacionit, mund ta afrojë fushën e kardiologjisë me zbulimet jetike, theksuan studiuesit.

“Sëmundja e zemrës mbetet e nëndiagnostikuar dhe e nëntrajtuar te gratë, dhe për fat të keq, udhëzimet tona ekzistuese të shqyrtimit zbulojnë gratë me rrezik të lartë mjaft vonë, shumë pasi duhet të kishin filluar përpjekjet parandaluese”, tha për UPI autori kryesor i studimit, Dr. Paul Ridker.

“Sëmundjet kardiovaskulare janë kryesisht të parandalueshme, por ne duhet të dimë se cili është problemi themelor biologjik për pacientin individual që po shohim në klinikë dhe duhet të ndërhyjmë shumë herët”, deklaroi Ridker, drejtor i Qendrës për Parandalimin e Sëmundjeve Kardiovaskulare në Brigham.