Greqia regjistroi 5,449 infeksione të reja me coronavirus në 24 orët e fundit, thanë autoritetet të hënën.

Dhe sipas mediave të huaja, përcjell Telegrafi, kjo është shifra më e lartë njëditore që nga fillimi i pandemisë në fillim të vitit të kaluar.

Në këtë drejtim bëhet e ditur se 52 persona të tjerë vdiqën nga COVID-19 gjatë ditës së kaluar, duke e çuar totalin në 15,990 në mesin e 747,595 rasteve të COVID-19.

Giannis Oikonomou, një zëdhënës i qeverisë, tha se ishte “nxitje” për të rritur numrin e vaksinimeve, proces që ka ecur me një ritëm më të ngadaltë nga sa parashikonin autoritetet.

“Nuk kemi mbaruar ende me COVID-19. Për sa kohë që ka njerëz të pavaksinuar, virusi gjen një terren të përshtatshëm për t’u përhapur”, ka thënë Oikonomou në një konferencë të rregullt të lajmeve të hënën.

Rreth 60.5% e grekëve janë të vaksinuar kundër COVID-19, më pak se mesatarja e Bashkimit Evropian prej 64.7%, sipas të dhënave më të fundit të disponueshme.