Dëshira e njerëzve për të udhëtuar dhe eksploruar është universale, por pandemia jo vetëm që gjymtoi ekonomitë e zhvilluara dhe ato në zhvillim, por gjithashtu pati një ndikim masiv social.
Kjo është arsyeja pse heqja e kufizimeve të udhëtimit dhe rifillimi i turizmit është i nevojshëm tani për të ndihmuar në fillimin e rimëkëmbjes dhe rritjes.
Këtë vit, Dita Botërore e Turizmit nxjerr në pah aftësinë unike të turizmit për të siguruar që askush të mos mbetet prapa pasi bota fillon të hapet përsëri dhe të shikojë drejt së ardhmes. Kjo është shtesë për objektivin e ditës për të nxjerrë në pah rëndësinë e sektorit të udhëtimit në ruajtjen dhe promovimin e kulturës dhe trashëgimisë në të gjithë botën.
Data dhe historia
Që nga viti 1980, Dita Botërore e Turizmit festohet çdo vit në të gjithë botën më 27 shtator. Në këtë ditë në vitin 1970 kur u miratuan Statutet e Organizatës Botërore të Turizmit të Kombeve të Bashkuara, të cilat konsiderohen një moment historik në turizmin global.
Kjo hapi rrugën për krijimin e Organizatës Botërore rë Turizmit (UNWTO) pesë vjet më vonë. UNWTO festoi Ditën e Parë Botërore të Turizmit si një kremtim ndërkombëtar më 27 shtator 1980.
Domethënia
Qëllimi i Ditës Botërore të Turizmit është të rrisë ndërgjegjësimin mbi rëndësinë e turizmit në ndikimin e vlerave sociale, kulturore, politike dhe ekonomike të bashkësisë ndërkombëtare. Në kohët e pandemisë në vazhdim, është e rëndësishme të rritet ndërgjegjësimi për sektorin e turizmit duke pasur parasysh se 90 për qind e vendeve të trashëgimisë botërore u mbyllën si rezultat i pandemisë vitin e kaluar dhe të rinjtë në komunitetet rurale ishin të papunë.
Sipas UNWTO, Dita Botërore e Turizmit “është dita e respektimit global që nxit ndërgjegjësimin për vlerën sociale, kulturore, politike dhe ekonomike të turizmit dhe kontributin që sektori mund të japë drejt arritjes së Qëllimeve të Zhvillimit të Qëndrueshëm”.
E sa i përket turizmit, edhe Kosova ka mjaft bukuri të cilat vlen të vizitohen, por pandemia bëri që numri i turistëve të bie përreth 70 për qind në vendin tonë.
“Sido që të jetë ka filluar që të kemi një numër të konsiderueshëm të vizitorëve të cilët kryesisht po i preferojnë vendet e Kosovës që janë vendet malore. Pra, vendet siç është Rugova, Deçani, Juniku dhe në vendet ku kanë më shumë të zhvilluar turizmin malor”, kishte thënë gjatë një interviste në muajin korrik Kryetari i Unionit të Turizmit në Kosovë (UTK), Baki Hoti.
Këto perla të vendit tonë i ka përmbledhur në formën më të mirë në dy video Fitim Sopjani, fotograf dhe krijues i videove.
