Klinika Emergjente e Qendrës Klinike Universitare e Kosovës, përmes një komunikate për media ka dhënë sqarime rreth vdekjes së 23 vjeçares në Drenas, për të cilën familjarët kanë pohuar se ajo ka ndërruar jetë tri ditë pasi ka marrë vaksinën kundër COVID-19.

Klinika Emergjente thotë se pacientja është sjellë në klinikë, me humbje të vetëdijes, me bebëza të zgjeruara, pa tension arterial, pa puls periferik, me frymëmarrje të vështirësuar, ku më pas nuk ka arritur të mbijetonte.

“Klinika Emergjente e Qendrës Klinike Universitare e Kosovës, në lidhje me lajmet e publikuara për vdekjen e Z. I ( 1998), nga fshati Zabel i Drenasit, sqaron se, pacientja vjen në Klinikën Emergjente në QKUK në ora 16:30, të datës 15 shtator 2021, me autoambulancë nga Qendra e Mjekësisë Urgjente në Prishtinë, për shkak të humbjes së vetëdijes, me bebëza të zgjeruara, pa tension arterial, pa puls periferik, me frymëmarrje të vështirësuar. Menjëherë mjekët dhe stafi shëndetësorë ka ndërmarrë masat reanimatore, pacientes i bëhen analizat laboratorike, radiologjike dhe konsulencat tjera mjekësore. Përkundër përpjekjeve maksimale nga stafi i Klinikën Emergjente, pacientja nuk arriti të mbijetonte, vdekja konstatohet në ora 17:45”, thuhet në reagimin e QKUK-së.

Klinika Emergjente thekson se “Diagnoza përfundimtare e vdekjes ishte hemoragjia intraabdominale ( gjakderdhje në bark) , shok hemorragjik”

Siç njofton Klinika Emergjente familjarët kanë refuzuar obduksionin.

Ndryshe, familjarët e 23 vjeçares, më herët në rrjetet sociale kanë pohuar se viktima ka ndërruar jetë tri ditë pasi është vaksinuar.

Ndërkaq, drejtori i Qendrës Kryesore të Mjekësisë Familjare në Drenas, Ismet Bogiqi, ka konfirmuar për Telegrafin se vajza ishte vaksinuar më datën 13 shtator, në procedurë të rregullt.