Zëdhënësi i Prokurorisë Themelorë në Pejë, Shkodran Nikçi ka dhënë detaje të reja lidhur me vrasjen e dyfishtë që ka ndodhur mbrëmë në Pejë, ku të vrarë kanë mbetur Astrit Ademaj dhe Blerand Kadrijaj, të dy zyrtarë të Partisë Demokratike të Kosovës.

Nikçi ka thënë se personi i cili është përfshirë në vrasjen e mbrëmshme, do të dalë nesër para gjykatësit, transmeton Telegrafi.

“Njëri nga të plagosurit është ndaluar, kurse prokuroria ka caktuar masën e paraburgimit për 48 orë, nesër do të del para gjykatësit. Po bëhen hetime intensive, janë sekuestruar dy armë, po ashtu gëzhojat që janë gjetur në vendin e ngjarjes”, tha ai në RTV Dukagjini, përcjell Telegrafi.

Nikçi tha se personi i cili po mbahet në paraburgim është i dyshuar për vrasje, teksa shtoi se kanë intervistuar edhe persona tjerë lidhur me rastin.

Ngjarja tragjike ka ndodhur ditën e mërkurë, rreth orës 20:00, në afërsi të një lokali të shkolla Ekonomike “Ali Hadri” në Pejë”.