Policia kroate e ka sjellë sërish shoferin e autobusit në Gjykatën e Qarkut të Sllavonski Brodit. Ai është parë duke u shfaqur në Gjykatë i shoqëruar nga policia dhe me pranga në duar.

Por, ajo çfarë bie në sy është se kësaj radhe nuk ishte me këmishën e përgjakur, pasi kishte veshur një tjetër dhe pritet nga çasti në çast të dëgjohen dëshmitë e pasagjerëve që ishin në autobus kur ndodhi aksidenti, ku si pasojë humbën jetën 10 persona, transmeton Telegrafi.

E dy pasagjere të cilat nuk kishin arritur t’i ndërrojnë rrobat, policia i ndihmoi të futen në objekt. Ato janë parë të veshura me ndërresa të reprezentacionit të Kroacisë, që u janë dhuruar mbrëmë nga qytetarët.

Pas kësaj, në ora 16:30 një autobus prite t’i dërgojë për në Osjek nga ku sonte pritet të udhëtojnë me aeroplan për në Kosovë.

Kujtojmë që shoferit të autobusit nga Kosova sot i është caktuar masa e paraburgimit prej 30 ditëve, e pas këtij verdikti avokati i tij mbrojtës Igor Cishper i është drejtuar mediave.

“Shoferit i vie shumë keq për atë çfarë ka ndodhur. Sa kam unë informacione, ai për asnjë moment nuk më ka thënë se ka fjetur pranë timonit. Më ka thënë disa gjëra që dua t’i mbaj për vete”, ka shtuar ai.